Stúlkur niður í fjórtán ára aldur láta gata á sér geirvörturnar

Mikil aukning hefur orðið á því að stúlkur og ungar konur láti gata á sér geirvörturnar. Eigandi stofu sem sér um slíkar aðgerðir segir að aðsóknin hafi aukist um 100 prósent á síðustu árum og að stúlkur allt niður í fjórtán ára gamlar láti gata á sér geirvörturnar.

Hin 28 ára Snædís Snorradóttir lét gata á sér geirvörturnar fyrir þrettán árum og segist sjá eftir því. „Ástæða þess að ég gataði á mér geirvörtuna er beinlínis rekjanleg til uppreisnar gegn foreldrum mínum,“ segir hún og bætir við: „Ég hugsaði þetta ekki til enda og var ómeðvituð um mögulegar afleiðingar á brjóstagjöf.“

„Þetta er gríðarlega vinsælt hjá ungu stelpunum í dag og við erum að fá stúlkur allt niður í 14 ára inn á stofu til okkar í fylgd með foreldrum,“ segir Seselia Guðrún Sigurðardóttir, eigandi Tattoo og skart á Hverfisgötu, og bætir við að augljóslega sé um trend að ræða. „Undanfarið ár hefur aðsóknin aukist um 100% og aldur þeirra sem óska eftir þjónustunni verður sífellt lægri,“ segir Seselia. 

„Heilu dagarnir eru bókaðir í geirvörtugötun. Við þekkjum dæmi þess að heilu vinkvennahóparnir eru gataðir og partur af innvígsluferlinu er einmitt að láta gata geirvörtu,“ útskýrir Seselia. Hún bætir við að konur sem taki þátt í fitness-keppni sé stór hópur viðskiptavina sinna og telur að vinsældir götunar á geirvörtum tengist auknum vinsældum fitness-keppni hér á landi. 

Seselia segist jafnframt fullviss um að stúlkurnar sem sækja í götunina séu í ákveðinni uppreisn gegn foreldrum sínum, sér í lagi þær yngstu. Þetta kemur heim og saman við sögu Snædísar. „Lokkinn var ég með í mér í 2 ár eða þar til það rann upp fyrir mér að þetta væri gersamlega tilgangslaust. Þetta var skraut sem fékk aldrei að njóta sín og gerði ekkert fyrir mig í ástarlífinu. Uppreisnin var sumsé allsráðandi.“ 

Snædís segist sjá mikið eftir að hafa gengist undir götunina og bendir á að það sé eitt að vera í uppreisn og annað að sætta sig við orðinn hlut þegar konur þurfa að höndla „að geta ekki gefið barninu ykkar brjóstamjólk út af ákvörðun sem þið tókuð í frekju- eða flippkasti“.