Halda matarboð með galopnum gestalista

„Þetta byrjaði þegar við lásum grein á netinu, ég og maðurinn minn, þá var einhver kona í Bandaríkjunum sem áttaði sig á því að þau hjónin ættu ekkert félagslíf, þau voru nýbúin að eignast barn og höfðu ekki mikinn tíma til þess að fara út og svona og ákváðu því að bjóða fólki bara heim til sín,“ segir Ásdís Eir Símonardóttir og skellihlær.

Hún hefur ásamt manni sínum, Sigurði Páli Guðbjartssyni, haldið matarboð með óvenjulegu sniði.

Hjónin ákváðu í kjölfar lestursins að halda slík matarboð einn föstudag í mánuði með galopnum gestalista.

Matarboðin auglýsa þau á Facebook og gestir skrá sig í Google Docs-skjali en hámarksfjöldi er sjö manns. Þau sjá því ekki um að bjóða gestunum, heldur bjóða þeir sér sjálfir.

Í matarboðunum er megináhersla lögð á góðan félagsskap og hversdagslega stemningu.

„Pælingin með þessu var líka að þetta ætti að vera svona „low maintenance“, ekki flókið „gourmet“ matarboð. Við erum bara með einfalda, góða rétti og gestir geta komið með eitthvað með sér; salat, drykki eða eftirrétt.“

Fram til þessa hafa þau boðið upp á lasanja og spaghettí með kjötbollum en Ásdís segir helstu áskorun matarboðanna fyrir sig fólgna í því að bjóða gestum heim án þess að hafa þrifið heimilið hátt og lágt.

Matarboðunum hefur að sögn Ásdísar verið vel tekið og iðulega þétt setið við matarborðið og vonast Ásdís og Sigurður eftir því að gestalistinn verði enn fjölbreyttari þegar fram líða stundir og einstaklingar þeim ótengdir skrái sig og setjist niður til snæðings með þeim.

„Í fyrsta skipti sem við héldum þetta urðu forföll á síðustu stundu. Þá vorum við búin að sjá hverjir voru búnir að læka upphaflega statusinn okkar á Facebook og sáum fólk sem var tilvonandi nágrannar okkar. Þannig vildi til að þetta var fyrrverandi kærasti systur hans frá unglingsárunum þannig að við buðum þeim bara,“ segir Ásdís og bætir við glöð í bragði: „Svo núna eru þau nágrannar okkar og við heilsumst og spjöllum saman af því að við erum búin að bjóða þeim í matarboð.“

Ásdís segir samræðurnar í matarboðunum lítið vandamál og engar óþægilegar þagnir, því mæli þau hjónin heilshugar með því að fleiri fylgi þeirra fordæmi.



Föstudagslasagna Sigga Palla

Fyrir 10-12 manns

Lasagna er góður kostur fyrir svona matarboð því það má elda sósurnar og setja í eldfast mót daginn áður (eða jafnvel 2-3 dögum áður) og geyma í kæli. Meðfylgjandi er uppskriftin sem Ásdís og Sigurður hafa notast við fyrir sín matarboð.

Kjötsósa

1,5 kg. nautahakk

3 laukar, hakkaðir

400-500g gulrætur, skornar í smáa bita

4-5 stilkar sellerí, smátt skornir

3-5 hvítlauksrif

3-4 dósir hakkaðir tómatar

1 dós tomato paste

Nautasoð eða vatn eða rauðvín eða sitt lítið af hverju, alls 3-4dL

2-3 tsk timjan

2-3 tsk oregano

smá múskat, nýmalað

smjör til steikingar

salt og pipar

Nautahakkið brúnað upp úr smjöri í stórum potti við háan hita (skipta kjötinu upp, ekki of mikið í einu).

Laukur, gulrætur, sellerí og hvítlaukur steikt í smjöri við meðalháan hita. Gott er að bæta smá salti út í til þess að draga vökva úr grænmetinu.

Tómötum, tomato paste, soði/vatni og/eða rauðvíni bætt út í ásamt kryddi. Allt hitað að suðu og svo látið malla við lágan hita, því lengur því betra.

Hvíta sósan

200g smjör

200g hveiti

2L nýmjólk

múskat

svartur pipar

salt

Mjólk hituð nálægt suðu.

Smjör brætt í potti eða djúpri pönnu. Hveiti hrært saman við. Gott getur verið að brúna blönduna örlítið.

Hitinn lækkaður. Heitri mjólkinni hrært saman við, einni eða tveimur súpu-ausum í einu.

Múskat, pipar og salt blandað út í eftir smekk.

Til samsetningar

Þurrkaðar lasagna plötur

Fínt rifinn parmesan ostur (ca. 200g)

2 pokar rifinn mozzarella ostur

Smyrjið 2 stór eldföst mót. Setjið þunnt lag af hvítu sósunni í botninn, svo lasagna plötur, svo kjötsósu, svo parmesan og svo hvíta sósu og svo koll af kolli, eins og mótið leyfir (ekki of mikið, þá sýður upp úr). Ofan á efstu lasagna plöturnar fer vænt lag af kjötsósu, vænt lag af hvítri sósu og mikið af parmesan.

Þegar þetta er komið má kæla og geyma í 2-3 daga.

Hitið lasagna í ofni við 200-210°C. Byrjið á að hita í u.þ.b. 25 mínútur (eða þangað til efsta lagið er orðið gullinbrúnt). Dreifið svo mozzarella ostinum yfir og hitið í 10-15 mínútur í viðbót (eða þangað til mozzarella osturinn er orðinn gullinbrúnn). Takið úr ofninum og látið standa í a.m.k. 15 mínútur áður en skorið er í.