Mikið af dópi og verðið óbreytt

Lögreglan hefur aldrei haldlagt meira magn af E-töflum en á þessu ári og haldlagt magn sterkra fíkniefna reis mikið frá síðasta ári. Í júní hafði lögreglan lagt hald á meira magn af kókaíni en tvö síðustu ár samanlagt.

Aldís Hilmarsdóttir, yfirmaður fíkniefnadeildar lögreglunnar á höfuðborgarsvæðinu, segir að það magn sem lögregla gerði upptækt virðist ekki hafa haft áhrif á markaðinn. „Verðið hefur haldist óbreytt.“

Hún segir að það sem standi upp úr þegar horft sé yfir árið sé það mikla magn sem var í hverri sendingu. „Við vorum að tala um áttatíu til hundrað kíló í húsbíl í Norrænu, tuttugu kíló í seinna Norrænu málinu og svo tuttugu kíló á Suðurnesjum.“

„Það hefur mikið reynt á samstarf við erlend lögreglulið. Einnig fórum við í mjög umfangsmikla aðgerð með Evrópu gegn sterainnflutningi, Operation underground, sem var gerð í september og gekk mjög vel. Þeir notuðu okkar aðferð við að elta fjármagnið sem gaf vel,“ segir Aldís.

Kristján Þór Júlíusson heilbrigðisráðherra hefur greint frá vilja sínum til að endurskoða refsistefnu í fíkniefnamálum. Aldís segir það skoðun sína að lögreglan eigi ekki að tjá sig um lagabreytingar heldur sé það verkefni lögreglu að fara að lögum.

„Þessi vinna sem er í gangi er mjög fagleg og það er leitað til álitsgjafa. Við komum okkar skoðunum á framfæri þar. Við munum fara eftir þeim lögum sem verða, hvenær sem það er. Mér persónulega finnst að Ísland eigi ekki að vera sporgönguland í þessu. Við eigum ekki að ráðast í þetta sem tilraunaverkefni.“

Í febrúar verður fíkniefnaráðstefna á vegum Sameinuðu þjóðanna haldin til að ræða refsistefnu á alþjóðavísu. „Við eigum bara að fylgjast með hvað heimurinn ætlar að gera í stað þess að vera á undan,“ segir Aldís.

Helstu fíkniefnamál ársins má rekja til smygls í ferjunni Norrænu á Seyðisfirði. Jónas Wilhelmsson Jensen yfirlögregluþjónn á Austurlandi segir samvinnu á milli lögregluembætta hafi borgað sig.

Hann óttast að helsta smyglleið inn til landsins sé orðin í gegnum hans umdæmi. „Við erum með stórar hafnir og mikið af fjörðum og víkum sem þægilegt er að komast inn í. Við erum með frekar fáliðaða lögreglu og okkur vantar peninga til að geta sinnt þessu.“

Fréttablaðið hefur heimildir fyrir því að erfið valdabarátta sé gjarnan á milli tollvarða og lögreglu þegar smygl kemur upp. „Það þekkist ekki hér hjá okkur en það virðist vera að það séu einhversstaðar einhverjir smákóngar sem þurfa að viðra sig annað slagið. Það er náttúrulega bara til skammar og gerir ekkert annað en að hefta okkur og eyðileggja samvinnu og færni. Menn eru settir út í kuldann af því þeir eru ekki sammála einhverjum höfðingjum,“ segir Jónas.