Öllum boðin áfallahjálp eftir ránið

Allir starfsmenn í útibúi Landsbankans í Borgartúni hafa fengið áfallahjálp og ráðgjöf eftir alvarlegar ógnanir þegar vopnað rán var framið í bankanum í gær. Þá hefur bankinn einnig haft samband við alla viðskiptavini sem gáfu lögreglu skýrslu eftir ránið og boðið þeim áfallahjálp og aðra aðstoð.

Öllum viðskiptavinum, þeim sem voru á vettvangi eða urðu vitni að ráninu er jafnframt boðið upp á áfallahjálp, ef þeir óska þess. Hægt er að hafa samband í síma 410 7904 og óska eftir aðstoð, að því er segir á vef Landsbankans. Mikilvægt geti reynst fyrir alla sem verði fyrir slíkri reynslu að ræða það við sérfræðinga.

Í tilkynningunni kemur jafnframt fram að starfsfólk Landsbankans sé þjálfað í viðbrögðum við atvikum sem þessum og að ljóst sé að það brást rétt við aðstæðum. Bæði viðskiptavinir og starfsfólk hafi haldið stillingu í þessum erfiðu aðstæðum, sem hafi reynst afar þýðingarmikið.