Hugmyndin var að vekja upp minningar

Vesturbæingurinn Jón Kári Eldon hefur verið búsettur í San Francisco síðastliðin þrjú og hálft ár.

Nú þegar hann var að klára seinustu önnina erlendis fór hugurinn að reika heim og hóf hann þá að teikna helstu kennileiti Vesturbæjar.

„Ég er að læra vefhönnun og nýmiðlun sem er kannski svipað og grafísk hönnun nema það fókuserar meira á allt annað en prent.

Þetta er ekki partur af neinu lokaverkefni heldur fór ég bara að dunda mér í þessu í lærdómspásunum.

Ég teiknaði fyrst mynd af Ísbúð Vesturbæjar og deildi henni á Instagram. Hún fékk góð viðbrögð og þá byrjaði ég að deila myndum af öðrum kennileitum annan hvern dag.“

Hugmyndin á bak við myndirnar var að vekja upp minningar.

„Þetta er bæði nostalgía fyrir mig og alla aðra Vesturbæinga. Maður á engar myndir af umhverfinu, fólk er bara að taka myndir af sjálfu sér.

Þegar ég var að leita að myndum til þess að vinna eftir þá var það nánast ómögulegt. Svo er þetta líka svo fljótt að breytast, enda fannst mér mikilvægt að teikna ísbúðina í gamla stílnum áður en nýju eigendurnir tóku við.

Fólk virðist vera að taka vel í þetta enda er ég búinn að fá þó nokkrar fyrirspurnir um að teikna önnur kennileiti og líka frá fólki sem vill kaupa myndir á síðunni.“

Jón þurfti ekki að hugsa sig tvisvar um þegar hann átti að nefna uppáhaldskennileitið sitt.

„Melabúðin verður alltaf uppá­haldið mitt. Hún er klassísk og er í rauninni miðja Vesturbæjarins. Það fyrsta sem ég gerði þegar ég kom heim í seinustu viku var að fá mér grillaðan kjúkling í Melabúðinni.“

Jón Kári hefur áður vakið athygli fyrir svipað verkefni en fyrr á árinu stofnaði hann heimasíðuna baggerbogg.is þar sem hann fór yfir ýmsa tölfræði sem fólst í því að hætta að taka tóbak í vörina. 

„Þegar ég fæ hugmyndir þá byrja ég bara hægt og rólega að vinna í þeim án þess að vita hvað ég ætla að gera með þær.

Það var þannig í báðum þessum tilvikum en maður reynir alltaf að vera að gera eitthvað. Það heldur hugmyndafluginu gangandi.“ 

Vefsíðuna má skoða á slóðinni 107.is.