Sport

Allt jafnt í fyrsta skipti í kjöri íþróttamanns ársins

Jón Arnór Stefánsson var kosinn íþróttamaður ársins 2014.
Jón Arnór Stefánsson var kosinn íþróttamaður ársins 2014. vísir/daníel
Íþróttamaður ársins verður útnefndur í 60. sinn frá upphafi á næstsíðasta degi ársins en 26 meðlimir Samtaka íþróttafréttamanna hafa greitt atkvæði og nú er komið í ljós hvaða íþróttafólk hafnaði í tíu efstu sætunum. Það eru jafn margar konur og karlar meðal tíu efstu annað árið í röð en það hafði aldrei gerst fyrir það kjör.

Nú er skipting einnig þannig að jafn margir úr einstaklingsíþróttum og hópíþróttum komast í hóp tíu efstu. Jón Arnór Stefánsson var kosinn Íþróttamaður ársins fyrir ári og hann er aftur meðal tíu efstu í ár. Hann er nú meðal tíu efstu í tíunda sinn og er tíundi íþróttamaðurinn sem nær því.

Jón Arnór er líka einn af þremur á listanum sem eru þar þriðja árið í röð en hin eru knattspyrnukonan Sara Björk Gunnarsdóttir og handboltamaðurinn Guðjón Valur Sigurðsson. Guðjón Valur Sigurðsson er nú í hópi tíu bestu í áttunda sinn á ferlinum. Gylfi Þór Sigurðsson er aftur á móti á topp tíu listanum fjórða árið í röð og í fimmta skiptið á sex árum.

Gylfi er einn af þremur á listanum í ár sem hafa hlotið titilinn áður en hinir eru Guðjón Valur og Jón Arnór. Sundkonurnar Eygló Ósk Gústafsdóttir og Hrafnhildur Lúthersdóttir eru báðar á listanum annað árið í röð sem þýðir að sex af tíu voru á listanum í fyrra.

Frjálsíþróttafólkið Aníta Hinriksdóttir og Helgi Sveinsson voru bæði á listanum fyrir tveimur árum og þá bæði í fyrsta skipti.

Tveir nýliðar eru á listanum að þessu sinni en knattspyrnumaðurinn Aron Einar Gunnarsson og kraftlyftingakonan Fanney Hauksdóttir eru meðal tíu efstu í fyrsta sinn.

Fanney er fyrsta kraftlyftingakonan í sögu kjörsins sem kemst í hóp tíu efstu.

Kjörinu á Íþróttamanni ársins 2015 verður lýst í hófi í Silfurbergi í Hörpu þann 30. desember en kjörið verður í beinni útsendingu á RÚV. Íþrótta- og Ólympíusamband Íslands og Samtök íþróttafréttamanna standa saman að hófi Íþróttamanns ársins í tuttugasta sinn.

Topp tíu listinn 2015:

Eygló Ósk Gústafsdóttir.vísir/anton brink
Aníta Hinriksdóttir

19 ára frjálsíþróttakona úr ÍR

Varð í 20. sæti í 800 m hlaupi á 2:01,01 mínútu sem er næstbesti tími hennar á ferlinum og dugði til að tryggja Anítu þátttökurétt á Ólympíuleikunum í Ríó.

Aron Einar Gunnarsson


26 ára knattspyrnumaður hjá Cardiff

Fyrirliði og lykilmaður á miðju íslenska landsliðsins sem tryggði sér sæti í lokakeppni stórmóts A-liða landsliða karla í fyrsta sinn, er Ísland komst á EM 2016 í Frakklandi.

Eygló Ósk Gústafsdóttir


20 ára sundkona úr Ægi

Varð fyrst íslenskra íþróttamanna að ná lágmarki fyrir Ólympíuleikana í Ríó í mars. Komst í úrslit á HM í 50 m laug og vann tvenn bronsverðlaun á EM í 25 laug í Ísrael, fyrst íslenskra kvenna.

Fanney Hauksdóttir

23 ára kraftlyftingakona úr Gróttu

Evrópumeistari í bekkpressu í -63 kg flokki og þriðja á heimslista í sínum þyngdarflokki. Heimsmeistari og heimsmethafi ungmenna sem og Íslandsmeistari í sama flokki.

Gylfi Þór Sigurðsson.vísir/vilhelm
Guðjón Valur Sigurðsson

36 ára handboltamaður hjá Barcelona

Spánar- og Evrópumeistari með Barcelona og lykilmaður í íslenska landsliðinu. Var markahæstur leikmanna Barcelona á síðustu leiktíð og í liði ársins í spænsku deildinni.

Gylfi Þór Sigurðsson


26 ára knattspyrnumaður hjá Swansea

Í lykilhlutverki hjá íslenska landsliðinu og valinn í úrvalslið undankeppni EM. Leikur með Swansea sem náði besta árangri sínum frá upphafi í ensku úrvalsdeildinni í vor.

Helgi Sveinsson

36 ára frjálsíþróttamaður úr Ármanni

Varð þriðji á HM fatlaðra og bætti heimsmetið í sínum flokki, F42, þar sem hann er í efsta sæti á heimslista. Kastaði lengst 57,36 m.

Fanney Hauksdóttir.vísir/daníel
Hrafnhildur Lúthersdóttir

24 ára sundkona úr SH

Fyrsta íslenska konan til að synda til úrslita á HM í 50 m laug, þar sem hún varð í 7. sæti í 50 m bringusundi og 6. sæti í 100 m bringusundi. Náði Ólympíulágmarki í fjórum greinum.

Jón Arnór Stefánsson

33 ára körfuboltamaður hjá Valencia

Lykilmaður í liði Íslands sem keppti á úrslitakeppni Evrópumótsins í fyrsta sinn. Lék með Malaga á fyrri hluta ársins og svo Valencia, sem er ósigrað á toppnum á Spáni.

Sara Björk Gunnarsdóttir

25 ára knattspyrnukona hjá Rosengård

Svíþjóðarmeistari með Rosengård þar sem hún er fastamaður. Liðið er komið í 8-liða úrslit Meistaradeildar Evrópu en Sara Björk er einnig lykilmaður með íslenska landsliðinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.