Desemberspá Siggu Kling – Ljón: Sendu spennu út í alheimsorkuna

Elsku ljónið mitt. Þú hefur verið að sinna svo mörgu undanfarið og tilfinningar þínar eru þandar til hins ýtrasta.

Ekki hugsa um að einblína á stress á þessum tíma sem er núna, fókuseraðu frekar á spennu.

Að setja spennu út í alheimsorkuna færir þér betri tíð! Stjörnurnar, alheimurinn og móðir jörð hlusta á allt sem við segjum og allt sem við segjum verður að orku sem eyðist ekki svo glatt.

Á svona spennutímum gerist svo margt sem við búumst ekki við og það gerir lífið svo dásamlega skemmtilegt ef vel er að gáð.

Að sýna þolinmæði og að brosa frá hjartanu til allra í kringum þig hækkar orku þína og setur þig í svo fallega tíðni. Gefðu fjölskyldu og vinum meiri tíma og hlustaðu með öllu hjartanu þínu á hvað þau eru að segja. Láttu fólki líða vel í kringum þig og láttu fólkinu finnast að það sé mikilvægt. Þetta er lykillinn að því að óskirnar þínar verði að veruleika.

Þú munt sjá og finna skilaboð frá mörgum manneskjum sem vilja þér vel. Að trúa og treysta er góður frasi fyrir þig í jólamánuðnum. Þú vinnur marga sigra og líka sigra yfir sjálfu þér. Þú nærð stjórn og tökum á þessu fallega lífi sem þú ert að lifa, yndislega ljónið mitt!

Það er allt að gerast á hárréttum tíma fyrir þá sem eru að spá í ástina svo enga óþolinmæði í því.

Það er mikill friður yfir jólunum sjálfum og engin ástæða til þess að vera að stressa sig því á endanum munt þú hugsa: Vá, þetta reddaðist allt saman!

Mottó verða aldrei gömul, hér vel ég tvö sterk sem þú hefur fengið áður og þau eru að sjálfsögðu enn í gildi í desember þannig að þú skalt hafa þau hugföst í mánuðinum:

Ég þarf ekki að sjá allan stigann til að taka fyrsta skrefið.

Ég er mátturinn og dýrðin.

Knús og koss, Sigga Kling

Fræg ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari Agent Fresco.