Ólafur Ragnar orðinn heiðursdoktor

Ólafur Ragnar Grímsson var sæmdur heiðursdoktorsnafnbót við hátíðlega athöfn í Kookmin háskólanum í Seúl á mánudag.

Greint er frá þessu á vef forseta Íslands en þar kemur fram að Ólafur Ragnar flutti fyrirlestur við það tækifæri og var skrifað undir samstarfssamning milli Háskólans í Reykjavík og Kookmin háskóla.

Rektor Kookmin-háskólans er sagður hafa getið sérstaklega framlags Ólafs Ragnars til umhverfisverndar og friðsamlegrar samvinnu þjóða og frumkvæðis hans í málefnum Norðurslóða. Fyrrum forsætisráðherra Kóreu, dr. Hong-Koo Lee, flutti einnig ávarp við athöfnina.

Fyrirlestur Ólafs Ragnars bar heitið: Iceland’sCleanEnergyEconomy - Lessons for aGlobalTransformation. Í fyrirlestri sínum fjallaði forseti um sjálfbæran orkubúskap Íslendinga og þá lærdóma sem aðrar þjóðir gætu dregið af reynslu Íslendinga í þeim efnum. Í kjölfarið svaraði Ólafur Ragnar fyrirspurnum nemenda og kennara.

Í gær heimsótti Ólafur Ragnar Heimskautastofnun Kóreu, KOPRI, sem er öflug vísindastofnun rúmlega tvö hundruð vísindamanna og sérfræðinga. Forystumenn stofnunarinnar gerðu grein fyrir fjölþættum og viðamiklum rannsóknum á náttúru og lífríki á Norðurslóðum og öðrum ísilögðum hlutum veraldar. KOPRI hefur tekið virkan þátt í þingum Hringborðs Norðurslóða - ArcticCircle, frá stofnun þess. Kemur fram á vef forseta Íslands að fyrirhugað sé að efla enn starfsemi Heimsskautastofnunarinnar á komandi árum.

Í kjölfarið heimsótti Ólafur Ragnar höfuðstöðvar hins nýja loftslags- og umhverfissjóðs GreenClimate Fund, sem stofnaður var með ákvörðun aðildarríkja Sameinuðu þjóðanna í Cancun árið 2010. Græna loftslagssjóðnum er ætlað að leggja fjármuni til verkefna í þróunarríkjum sem tengjast loftslags- og umhverfismálum, ekki síst að styðja ríki til þess að endurskipuleggja orkubúskap sinn í átt til sjálfbærni og aðstoða þau ríki sem helst munu glíma við margvíslegar afleiðingar loftslagsbreytinga.

Á fundinum gerði Gunnar Bragi Sveinsson utanríkisráðherra m.a. grein fyrir ákvörðun ríkisstjórnar Íslands um að framlög Íslands til hans verði ein milljón Bandaríkjadala sem dreifast muni á árin 2016-20.