Hundarnir bitu Vonn til blóðs

Skíðakonan Lindsey Vonn þurfti að fara á sjúkrahús eftir að hafa lent í átökum við hundana sína.

Vonn var að reyna að stöðva slag á milli hundanna um frisbídisk og það endaði með því að hún fékk vænt bit í hendina. Vonn vildi þó sem minnst gera úr málinu og segist vera í góðu lagi.

Hundarnir tveir sem Vonn á voru heimilislausir en hún bjargaði þeim. Hún segir þá vera afar gæfa þó svo þeim hafi hlaupið kapp í kinn um helgina.

Vonn er sjálf enn að jafna sig eftir að hafa ökklabrotnað fyrir rúmum þrem mánuðum síðan í Nýja-Sjálandi.

Hún hefur unnið 67 heimsbikarmót sem er met. Vonn vonast eftir því að komast aftur í brekkurnar um næstu mánaðarmót.

So the story is that my dogs got rowdy fighting over a dang frisbee and I tried to break it up but got bit instead. Fun weekend

— lindsey vonn (@lindseyvonn) November 7, 2015