Innlent

Móðir greindarskerta fangans: „Þetta er algert hneyksli“

Telma Tómasson skrifar
Hollensk móðir segir meðferð á greindarskertum syni sínum í íslensku fangelsi hneyksli. Hann hafi lítið annað gert en grátið þegar hún fékk að tala við hann í nokkrar mínútur símleiðis. Telma Tómasson ræddi við hana fyrir kvöldfréttir Stöðvar tvö.

Hollenski maðurinn, Angelo Uijleman, var handtekinn ásamt tveimur Íslendingum og öðrum Hollendingi í tengslum við rannsókn á smygli á 23 kílóum af sterkum fíkniefnum til landsins með Norrænu.

Gea vissi vikum saman ekki hvar sonur hennar var niðurkominn. Lýst var eftir manninum á vefnum reddit.com.
Hann hefur setið í einangrun á Litla-Hrauni frá 29. september, sem hefur verið gagnrýnt mjög þar sem hann er greindarskertur og skilur ekki aðstæður að sögn móður hans. Hún býr í bænum Wageningen í Hollandi, og vissi vikum saman ekki hvar sonurinn var niðurkominn, hvað þá að hún næði tali af honum. Símtal var loks leyft í síðustu viku, undir eftirliti lögreglu.

Grét og sagðist hafa gengið í gildru

„Ég fékk að tala við hann 4. nóvember eftir að við fórum fram á það sjálf,“ segir Gea Uijleman, móðir Angelos. „Okkur fannst ekki eðlilegt að móðir fengi ekki fregnir af syni sínum í 5-6 vikur. Þetta er algert hneyksli, ég gat ekki ímyndað mér að svona gæti átt sér stað.“

Samtalið varði aðeins í örfáar mínútur.

Var símtalið mjög tilfinningaþrungið?

„Það var svo þrungið tilfinningu að ég hugsaði: „Hvað er að gerast?““ segir Gea. „Hann var við það að bugast. Hann grét bara og grét og sagði: „Af hverju er ég innilokaður hér, ég hef gengið í gildru. Ég er hér í algerri einangrun.““

Fíkniefnin komu hingað til lands með Norrænu þann 22. september síðastliðinn.
Veit ekki hver næstu skref verða

Fjölskyldan vill ekki firra manninn ábyrgð, en móðir hans segir þó að honum sé ekki fullkomlega ljóst fyrir hvað hann sé ákærður. Hún segir Angelo afar trúgjarnan og fullyrðir að hann hafi haldið að hann væri að sendast með pakka fyrir vinnuveitanda sinn, en Angelo starfaði við sendlastörf í Hollandi.

Gæsluvarðhaldsúrskurður yfir honum og meintum samverkamönnum rennur út á morgun en Gea veit ekki hvað bíður hans í framhaldinu.

„Ég veit ekki hver næstu skref eru,“ segir hún. „Ég bíð bara dag eftir dag því ég veit ekki hvað koma skal. Ég veit það í alvöru ekki.“

Hún vill þakka öllum þeim sem á einn eða annan hátt hafa lagt syni sínum lið, með stuðningi eða öðrum gjörðum.

„Ég get auðvitað ekki náð tali af þessu fólki og ég veit ekki heldur um allt sem hefur gerst, en ég vil þó þakka öllum fyrir að hjálpa syni mínum.“


Tengdar fréttir

Fékk að ræða við móður sína

Greindarskertur ­hollenskur maður sem hefur verið í einangrun á Litla-Hrauni síðan 29. september hefur fengið að hafa samband við móður sína undir eftirliti lögreglu.




Fleiri fréttir

Sjá meira


×