Nóvemberspá Siggu Kling – Nautið: Þú hefur aflið sem til þarf

Elsku nautið mitt. Þann 27. október var fullt tungl í nautsmerkinu. Það er þó nokkur spenna í kringum þetta tímabil sem þú ert að fara inn í núna og tilhlökkun og kvíða er hrært saman í einn graut en það mun koma þér á óvart hversu vel það mun rætast úr allri vitleysunni hjá þér.

Þú finnur að þú hefur góð tök á fólki og það mun elska að hjálpa þér þegar þú þarft á því að halda. Október og nóvember færa þér frelsi í sinni ótrúlegustu mynd og þú verður sátt í eigin skinni og ánægt með þig.

Þú þarft að fara vel með þig og ekki stressa þig of mikið því að stress er að mínu mati upphaf allra sjúkdóma svo reyndu að slaka á.

Þú þarft að segja upphátt við alheiminn „Ég ætla að slaka á og láta mér líða vel". Þetta er orkan sem þú þarft að kalla á og þú hefur aflið sem þarf til þess að gera það.

Í ástamálunum þarft þú bara að slaka aðeins á. Það er allt að gerast á réttum tíma og þú þarft að muna að þú getur ekki stjórnað tímanum þó að þú viljir það. Það er einhver að skoða þig og spennandi manneskjur vilja fá þig í sitt lið. Taktu vel eftir öllu í kringum þig því þú ert að rokka þessa dagana!

Lokaðu á alla feimni, hún er hvort eð er bara blekking þíns eigin huga. Ekki vanda þig of mikið með orðin þín því þegar þú sleppir því að ofhugsa hlutina þá talar þú beint frá hjartanu og hjartað þitt er að fara í rétta átt, elskan mín.

Mottó: Það er djamm á morgun og hinn og hinn...

Fræg naut: Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon.