Sex slösuðust eftir að orkulítill ökumaður ók yfir á rangan vegahelming

Sex voru fluttir undir læknishendur eftir að harður árekstur varð á Norðurljósavegi í umdæmi lögreglunnar á Suðurnesjum í vikunni. Ökumaður annarrar bifreiðarinnar kvaðst hafa verið að koma úr Bláa lóninu, hefði hann ekkert borðað í langan tíma og verið lengi í lóninu.

Í tilkynningu frá lögreglunni á Suðurnesjum sagðist maðurinn hafa verið að detta út þegar hann ók yfir á rangan vegarhelming og framan á bifreið sem kom úr gagnstæðri átt. Ökumaðurinn og farþegi sem með honum var voru fluttir á Landspítala.

Í hinni bifreiðinni voru fjórir, sem allir voru fluttir á Heilbrigðisstofnun Suðurnesja og tveir þeirra áfram á Landspítala. Ekki liggja fyrir nákvæmar upplýsingar um meiðsl ökumanna og farþega sem allir voru erlendir ferðamenn.

Fleiri umferðaróhöpp urðu í umdæminu í vikunni, en ekki var um að ræða slys á fólki. Í einhverjum tilvika voru bifreiðirnar þó óökufærar og varð að fjarlægja þær með dráttarbifreið.