Aron fór undir hnífinn í dag

Aron Jóhannsson verður frá næstu vikurnar en félag hans, Werder Bremen í Þýskalandi, tilkynnti í dag að hann hafi gengist undir aðgerð á mjöðm.

Aron hefur verið að glíma við taugaverki í mjöðminni en þar sem að viðunandi árangur hefur ekki náðst með læknismeðferð síðustu vikna var ákveðið að fara í aðgerð.

Aron kom til Werder Bremen frá AZ Alkmaar í Hollandi í sumar en kappinn, sem er bandarískur landsliðsmaður, skoraði tvö mörk í fyrstu sex leikjum sínum með liðinu.

Aðgerðin var framkvæmd í Berlín og þar verður hann næstu daga þar til að hann snýr aftur til Bremen til að halda áfram endurhæfingu sinni.