Slær „eiturefnahernað“ af borðinu í Dalvíkurbyggð

„Það verður ekki farið í neinn eiturefnahernað hér í Dalvíkurbyggð,“ segir Bjarni Theódór Bjarnason, bæjarstjóri Dalvíkurbyggðar, vegna frétta af eyðingu illgresis í sveitarfélaginu.

Fréttablaðið sagði frá því á þriðjudag að Valur Þór Hilmarsson, umhverfisstjóri Dalvíkurbyggðar, hefði gert áætlun til fimm ára um að hefta útbreiðslu lúpínu, kerfils og njóla. Byggðaráð fól Vali að gera þessa áætlun í mars í fyrra. Í frétt Fréttablaðsins sagði ranglega að aðgerðaráætlun umhverfisstjórans hefði verið samþykkt í byggðaráði. Hið rétta er að hún var lögð fram til kynningar.

„Gerðar hafa verið tilraunir með að slá og/eða eitrun með gjöreyðingarlyfinu Roundup/Clinic. Reynt hefur verið að slá lúpínu og kerfil til að halda útbreiðslunni í skefjum, sláttur kemur ekki í veg fyrir að plönturnar lifi af en hann takmarkar útbreiðslu þeirra. Af fenginni reynslu verður eitrað fyrir lúpínu, eins verður gert við kerfil og njóla. Á lúpínu og kerfil verður notað Roundup en á njóla verður notað Herbamix eða Harmoni,“ var vitnað til áætlunar umhverfisstjórans í Fréttablaðinu á þriðjudag.

Aðspurður segir Bjarni bæjarstjóri sjálfsagt ekki meira um lúpínu í Dalvíkurbyggð en almennt um landið. „Það er heilmikið berjaland í fólkvangnum fyrir ofan bæinn og það bera margir kvíðboga fyrir því að það fari undir lúpínu ef ekkert verður að gert. Byggðaráð var bara að kalla eftir því hver hugsanlegur kostnaður við eyðingu á lúpínu væri. Það var enginn að ímynda sér að það gætu verið einhver eiturefni í spilinu. Og málið er ekki einu sinni komið í faglega umræðu í umhverfis­ráði þar sem situr gagnrýnið fólk sem myndi vilja að umhverfisstjórinn leitaði sér ráða hjá opinberum stofnunum og öðrum,“ segir Bjarni.

Í fyrrnefndri frétt Fréttablaðsins kom fram í samtali við umhverfis­stjórann að eitur yrði ekki notað þar sem hætta var á að það mengaði grunnvatn og einnig yrði notast við slátt og sauðfjárbeit til að halda lúpínu í skefjum.

Umhverfisstofnun segir illgresiseyðinn Roundup nú til skoðunar innan Evrópusambandsins vegna vísbendinga um að hann kunni að innihalda krabbameinsvaldandi efni.

„Það hafa komið vísbendingar um að þetta geti verið skaðlegt lífríkinu og krabbameinsvaldandi og auð­vitað ætlum við ekki taka á ábyrgð á því heldur látum lífríkið njóta vafans í öllu sem við gerum. Að minnsta kosti mun ég ekki standa fyrir því að séu notuð slík efni,“ segir bæjarstjórinn og minnir á að um sé að ræða landbúnaðarhérað og Dalvíkingar hafi byggt upp ímynd í kring um Fiskidaga. „Og fyrir utan að ef þetta er skaðlegt, þá viljum við einfaldlega ekki sjá það.“