Velferðarkerfi borgarinnar sagt úrræðalaust bákn

Grímur Atlason framkvæmdastjóri birti nú rétt í þessu harðorðan pistil á Facebooksíðu sinni þar sem hann beinir sjónum sínum að velferðarkerfi Reykjavíkurborgar; sem hann segir úrræðalaust bákn sem snýst fyrst og fremst um að viðhalda sjálfu sér.

19 milljarðar svo gott sem í vaskinn

„Það skortir verulega á úrræði í Reykjavík og einstaklingar festast í úrræðaleysi kerfisins. Eins sorglegt og það hljómar mætti vel losa verulegan fjölda stöðugilda á skrifstofum báknsins án þess að þjónustan myndi versna. Það fara allt of miklir peningar í fólk við skrifborð sem gerir ósköp lítið annað en að skrifa fólk niður á biðlista. Andleysi, máttleysi og úrræðaleysi einkennir því miður allt of margar „þjónustumiðstöðvar“ þessa kerfis. Það kostar þannig 3 milljarða á ári að reka skrifstofurnar og ráðin. Kerfi innan kerfisins sem viðheldur sjálfu sér.“

Grímur talar af reynslu og greinir frá því að hann hafi starfað í þessu kerfi og þekki það því vel. „Ég er dag aðstandandi notenda þess og þarf því að tala við kerfið oft á ári. Það mætti nota þessa 19 milljarða sem velferðarsviðið kostar (utan málefna fatlaðra) svo miklu, miklu betur. Báknið þarf ekki að stækka og stækka endalaust og án tilgangs.“

Af aumingjavæðingu og öðru fólki

Mikil umræða um velferðarkerfið í Reykjavík hefur sprottið upp í kjölfar viðtals Fréttablaðsins við Björk Vilhelmsdóttur, fráfarandi borgarfulltrúa Samfylkingarinnar, en orð Bjarkar reyndust umdeild. Hún sagði að skera þyrfti þetta kerfi upp og nálgast út frá öðru sjónarhorni; þar væri gert út á „veikleikavæðingu“. Það vanti hvata til að fara út á vinnumarkaðinn og fólk festist í bótakerfinu.

Sigríður Ingibjörg Ingadóttir Samfylkingu, og formaður velferðarnefndar Alþingis, gagnrýndi orð Bjarkar og sagði það liggja fyrir, samkvæmt öllum rannsóknum, að sterkt velferðarkerfi væri vænlegast til árangurs með það fyrir augum að virkja fólk til atvinnuþátttöku.

Orð Bjarkar hafa verið lögð upp sem svo að þau séu á pari við gagnrýni Bjarna Benediktssonar fjármálaráðherra sem sagt hefur að stefna Samfylkingarinnar sé einmitt þessi, að vilja bótavæða samfélagið.

Vandamálum annarra sveitarfélaga ýtt yfir til Reykjavíkur

Grímur segir Björk hafa bent á galla í velferðarkerfi Reykjavíkurborgar, hann sé ekki sammála framsetningunni en það liggi hins vegar fyrir að kerfið virki ekki.

„Ég held að það stafi fyrst og fremst af stjórnlausri uppbyggingu skrifstofubákns sem kallast Félagsþjónusta Reykjavíkur - reyndar Velferðarsvið í dag (held ég). Það þarf samt að koma fram, áður en Kjartan, Áslaug, Halldór og co. [borgarfulltrúar Sjálfstæðisflokks] hrópa heyr heyr!, að sveitarfélögin í kringum Reykjavík (að Hafnarfirði undanskildum) hafa um langt árabil bolað flestum „frávikum“ og „vandamálum“ innan þeirra yfir til Reykjavíkur. Seltjarnarnes og Garðabær eru eins langt frá því og hugsast getur að kallast fyrirmyndarsveitarfélög. Þannig þarf Reykjavíkurborg að sinna mun erfiðari verkefnum og stærri en öll önnur sveitarfélög á Íslandi til samans.“

Jæja ég ætla að vera svolítið hvass og ekki pólitískt korrekt. Björk Vilhelmsdóttir benti á galla í velferðarkerfi...

Posted by Grímur Atlason on 14. september 2015