Umhverfisfulltrúi kannar skriðuhættu vegna lúpínu í fjalllendi

„Það er ekki hægt að útrýma lúpínu en það þarf að gera eitthvað til að halda henni í skefjum,“ segir Ralf Trylla, umhverfisfulltrúi Ísafjarðarbæjar, sem kannar nú hvort lúpína skapi hættu á skriðföllum.

Umhverfisnefnd bæjarins fól Ralf að hafa samband við sérfræðinga hjá Veðurstofu Íslands og fleirum og afla gagna um mögulega skriðuhættu á lúpínusvæðum í kjölfar erindis frá Kristínu Mörtu Hákonar­dóttur um samhengi gróðurs og flóðahættu. Á fundi nefndarinnar óskaði Ralf jafnframt eftir heimild til rannsókna á hættu á jarðskriðum eða snjóflóðum vegna lúpínugróinna svæða ofan byggðarkjarna.

„Það eru ekki til á Íslandi rannsóknir á jarðskriðuhættu vegna lúpínu,“ segir Ralf sem telur þó rökrétt að óttast hættu á skriðum vegna lúpínu.

„Í brattri brekku þar sem er mikið af lúpínu býr hún til jarðveg og festir sig við grunninn. Þegar  blotnar verður jarðvegurinn þungur og kannski lausari en venjuleg íslensk fjallabrekka. Spurningin er hvað þarf til að slíkt fari af stað,“ útskýrir Ralf. Sjálfur segist Ralf ekki hafa dæmi um skriðuföll af fyrrgreindum orsökum á Íslandi en kveðst vera í sambandi við ýmsa aðila hér  til að afla upplýsinga.

„Þetta snýst ekki bara um jarðskrið heldur líka hvort meiri líkur séu á snjóflóðahættu ef plöntur eru ofan á. Dæmi um þetta eru meðal annars frá Sviss,“ segir Ralf. Hann segist telja að það kunni að vera áhugavert að fá gleggri mynd af þessum málum.