Þensluáhrif fjárlagafrumvarpsins 2016 metin á um 40 milljarða

Efnahagssvið Samtaka atvinnulífsins áætlar að þensluáhrif fjárlagafrumvarpsins fyrir árið 2016 nemi tæpum 40 milljörðum króna. Þetta kemur fram í greiningu þess Fjárlagafrumvarp 2016: Hvert liggur leiðin.

Útgjöld ríkissjóðs nær aldrei hærra hlutfall af landsframleiðslu

Í greiningunni kemur fram að afnám tolla og lækkun skatta á einstaklinga séu jákvæðar breytingar. Mikilvægt sé að framhald verði á slíkum aðgerðum og það svigrúm sem myndast við stækkun tekjustofna sé nýtt til að einfalda skattkerfið og draga tilbaka þá aukningu sem orðið hefur á skattbyrði fyrirtækja og einstaklinga. Hins vegar séu slíka breytingar þensluhvetjandi og því nauðsynlegt að draga úr útgjöldum á móti. Ríkisfjármalin draga þó ekki úr þenslu. Útgjöld ríkissjóðs að frátöldum fjármagnskostnaði og öðrum útgjöldum sem óhjákvæmilegt er að falli á ríkissjóð hafa aukist frá árinu 2012 og hafa nær aldrei verið hærra hlutfall af landsframleiðslu. Boðuðum skattalækkkunum og niðurfellingu tolla er því ekki mætt með minni útgjöldum.

Í greiningunni kemur einnig fram að af ríkjum Evrópu greiðir íslenska ríkið hæsta hlutfall landsframleiðslu í vaxtakostnað. Þrátt fyrir lítinn afgang af ríkisrekstrinum er áætlað í fjárlagafrumvarpinu að hefja niðurgreiðslu skulda. Einnig er þar tekið fram að stefnt sé á frekari niðurgreiðslu skulda skapist til þess svigrúm við afnám hafta. Uppsveifur eru aldrei eilífar og nú þegar tekjur ríkissjóðs vaxa eins og raun ber vitni er nauðsynlegt að búa í haginn. Fjármálastefnu ríkissjóðs verður að haga þannig á komandi árum að næst þegar illa árar verði útgjöldin ekki í hæstu hæðum, skattprósentur við þolmörk og skuldastaðan sligandi. 

Hér má lesa greininguna í heild sinni.