Þingmaður Sjálfstæðisflokksins hnýtir í Davíð með því að rifja upp gamla ræðu

„Þetta var vel mælt, eins og margt annað hjá þeim manni. En ég vissi það ekki fyrr en í gær að hann meinti ekkert með þessu,“ segir Unnur Brá Konráðsdóttir, þingmaður Sjálfstæðisflokksins, á Facebook þar sem hún rifjar upp ræðu Davíðs Oddssonar á landsfundi Sjálfstæðisflokksins í október árið 2005 þegar hann gegndi enn formennsku í þeim flokki.

Í ræðunni sagði Davíð samstöðu vestrænna lýðræðisríkja innan Atlantshafsbandalagsins, NATO, vera þá brjóstvörn sem villimennska kommúnismans brotnaði á. Davíð er eins og margir vita annar af ritstjórum Morgunblaðsins í dag en hann gagnrýndi Gunnar Braga Sveinsson utanríkisráðherra í Reykjavíkurbréfi Morgunblaðsins fyrir að styðja viðskiptaþvinganir vestrænna ríkja gegn Rússlandi.

Fyrir tæpum áratug, hinn 13. október 2005, hlýddi ég á ræðu manns sem komst svo að orði:"Samstaða vestrænna lýðræðisrí...

Posted by Unnur Brá Konráðsdóttir on Wednesday, August 19, 2015

Árið 2005 sagði Davíð þörfina á samstöðu vestrænna ríkja innan NATO mikilvæga og að reynt hefði töluvert á hana í aðdraganda Íraks stríðsins, en Ísland var á lista hinna staðföstu ríkja sem studdu afvopnum Íraks, en það voru Davíð Oddsson, þáverandi forsætisráðherra, og Halldór Ásgrímsson, þáverandi utanríkisráðherra, sem tóku þá ákvörðun.

Á landsfundinum árið 2005 sagði Davíð Íslendinga hafa verið í hópi þeirra þjóða sem lagt hafa áherslu á að ekki mætti veikja tengslin milli Evrópuríkja og Bandaríkjanna.

„NATO stóð af sér þessa prófraun. Sameiginlegir hagsmunir, sameiginleg gildi og sameiginleg saga reyndust öllu sundurlyndi yfirsterkara. Bandalagið er nú stærra en áður og mörg fyrrum ríki Austur - Evrópu njóta nú verndar og öryggis sem íbúar þeirra landa gátu ekki látið sig dreyma um fyrir örfáum árum. Okkur Íslendingum er það sérstakt ánægjuefni að þjóðir Eystrasaltsins eru nú orðnar fullgildir aðilar að bandalaginu. Innganga þeirra tryggði í sessi frelsi þeirra og varanlega lausn undan því grimmdar oki sem á þeim hafði hvílt áratugum saman,“ sagði Davíð.

Unnur Brá Konráðsdóttir hefur áður lýst yfir stuðningi Íslands við refsiaðgerðir Evrópusambandsins og vesturvelda gagnvart Rússlandi, en síðastliðinn föstudag sagði hún Ísland standa stolt með vestrænum lýðræðisríkjum.

„Gleymum því ekki að það er Rússland sem er að beita Ísland viðskiptaþvingunum. Ekki öfugt. Gleymum því ekki að aðgerðir Vesturlanda beinast gegn fámennri elítu en aðgerðir Rússa skaða almenning. Rússnesk stjórnvöld hafa það í sinni eigin hendi hvort eðlileg viðskipti geti haldið áfram. Þeir geta einfaldlega lyft viðskiptabanninu og látið af hermangi í Úkraínu.“

Að sjálfsögðu tekur Ísland þátt í refsiaðgerðum Evr­ópu­sam­bands­ins og vest­ur­velda gagn­vart Rússlandi. Ísland...

Posted by Unnur Brá Konráðsdóttir on Monday, August 17, 2015