Arnar: Ákvörðunin um að svipta mig titlinum kom á óvart

Arnar Pétursson, sem bar sigur úr býtum í víðavangshlaupi ÍR þann 23. apríl síðastliðinn, sendi frá sér yfirlýsingu í dag þar sem hann gagnrýnir ákvörðun Frjálsíþróttasambands Íslands að svipta hann titlinum.

Um var að ræða Íslandsmeistaramótið í 5 kílómetra götuhlaupi en Arnar stytti leið sína að endamarkinu undir lok hlaupsins. Var hann í harðri baráttu við Ingvar Hjartason úr Fjölni á þeim tímapunkti en hann kom í mark örfáum sekúndubrotum á undan Ingvari.

Arnar gagnrýndi merkingar í hlaupinu á sínum tíma í Íslandi í dag en ÍR-ingar tóku fyrir að eitthvað hefði farið úrskeiðis í merkingunum á hlaupinu.

Segir Arnar í tilkynningunni, sem sjá má hér fyrir neðan, að hann hafi þurft að hoppa yfir malbikið til þess að rekast ekki á staur í vegi sínum. Hann hafi ekki gert sér grein fyrir því hvort hann væri að stytta sér leið.

Hann endar tilkynninguna á því að segja að hann muni ekki aðhafast meir í málinu en segist ekki hafa vitað af því að stjórn FRÍ hafi verið að aðhafast í málinu. Hafi hann ekki fengið tækifæri á að útskýra sitt mál.

Yfirlýsing Arnars:

Ég vil byrja á því að koma því á framfæri að það var algjörlega óviljandi þegar ég skar loka beygjuna í Víðavangshlaupi ÍR 23. apríl sl. Það breytir því ekki að þessi ákvörðun stjórnar FRÍ kom mér mjög á óvart enda vissi ég ekki að það væri verið að fara að taka ákvörðun í þessu máli heldur frétti ég af þessu á svipuðum tíma og fjölmiðlar.

Á engu stigi málsins var haft samband við mig og beðið um mitt álit eða ég látinn vita að von væri á niðurstöðu.

Þau gögn sem stjórn FRÍ byggði ákvörðunina sína á voru að mér sýnist eingöngu framburður kæranda og myndbandsupptaka frá einu sjónarhorni en það má deila um hvort það gefi rétta mynd á það sem gerðist í raun og veru. Ástæða þessa atviks er fyrst og fremst vegna þess að brautarmerkingar voru því miður ófullnægjandi.

Ég var á fullri ferð með mjólkursýru upp í haus á lokasprettinum og um leið og ég var búinn að taka skrefið til að taka beygjuna þá var það næsta sem ég sá staur, þetta var í fyrsta og eina skiptið sem ég sé staurinn.

Á þeim tímapunkti var ekki möguleiki að taka aðra stefnubreytingu til að fara hægra megin við staurinn svo ég endaði með að fara vinstra megin við hann og þá fyrst fór ég yfir gangstéttarbrún. Á milli fánaborgarinnar og staursins var hinsvegar engin keila eða hindrun sem ég fór yfir heldur var þar auð gata sem olli því að ég hélt að þetta væri rétta beygjan til að byrja með.

Því miður hefur þetta mál og sérstaklega umræðan í kringum það farið úr böndunum alveg frá byrjun og er hægt að telja til marga þætti sem því ollu. Til að mynda var brautin ekki nægilega skýrt afmörkuð svo hún bauð upp á að fólk gæti stytt sér leið á ýmsum köflum í brautinni.

Einnig vantaði yfirdómara frá FRÍ til að fylgjast með framgangi hlaupsins. Svo eru kommentakerfi ekki beint sett upp með það í huga að fólk kynni sér málið til hlítar.

Í staðinn er málið sett upp þannig að ég er í raun ásakaður um að hafa stytt mér leið viljandi sem gæti ekki verið fjarri sannleikanum. Þetta er ekki ósvipað því ef að íþróttamaður myndi stíga óviljandi á línuna í hringhlaupi.

Þó að það sé hægt að benda á ótal galla í meðferð á þessu máli alveg frá byrjun þá tel ég það ekki vera íþróttinni eða mér til framdráttar að halda áfram að karpa í þessu máli enda er svo miklu skemmtilegra að keppa í hlaupum en að deila á vettvangi sem þessum.

Ef FRÍ telur að þetta sé réttasta niðurstaðan þá mun ég ekki aðhafast meira í málinu og vona ég að bæði frjálsíþróttaforystan og aðrir áhugamenn um hlaup geti beint kröftum sínum í aðra og meira uppbyggjandi hluti. Ég ætla í það minnsta að gera það.

Arnar Pétursson