Miðasala á Eistnaflug 2016 hafin

Forsala á tólfta Eistnaflug er hafin. Frá þessu greinir forsprakkinn Stefán Magnússon á Facebook en 250 miðar eru í boði á sérstöku forsöluverði, 15 þúsund krónur.

Athyglisvert er að sala miða hefst tveimur dögum eftir að Eistnaflug 2015 lauk en hátíðin fór fram á Norðfirði 9.-12. júlí. Á næsta ári verður hátíðin dagana 6.-9. júlí.

Nú þegar er búið að bóka hljómsveitirnar Belphegor frá Austurríki og Melechesh frá Ísrael, ásamt íslensku sveitunum Beneath, In the Company of Men, Pink Street Boys og Ophidian I.

„Það er á hreinu að stefnan verður tekin á að toppa hátíðina í ár,“ segir Stefán Magnússon og minnir á að „það er bannað að vera fáviti á Eistnaflugi og ekkert helvítis rugl!!!!“

Hér að neðan má sjá myndir frá tónleikum HAM og FM Belfast á nýafstöðnu Eistnaflugi. Freyja Gylfadóttir tók myndirnar fyrir Vísi. Forsalan fer fram hér.