Já kaupir Gallup

Upplýsingafyrirtækið Já hefur keypt allt hlutafé í Gallup.

Heildarvelta Já eftir kaupin verður um 1,7 milljarðar króna og fjöldi starfsmanna um eitt hundrað. Þjónusta Gallup verður áfram undir merkjum Gallup og þjónusta Já undir merkjum Já eftir kaupin.

Í tilkynningu segir að undanfarin ár hafi Já lagt áherslu á upplýsingaþjónustu sem auðveldi viðskipti og samskipti. Gallup hafi verið í forystu á sviði markaðs-, starfsmanna- og viðhorfsrannsókna. „Með kaupum Já á Gallup hefur verið lagður grunnur að einu öflugasta upplýsingafyrirtæki landsins. Sameiginleg markmið Já og Gallup eru að bjóða upplýsingaþjónustu sem byggir á nýjustu tækni og traustum gögnum með viðskiptavini í forgrunni.“

„Við förum í þetta verkefni fullviss um að viðskiptavinir Já og Gallup njóti góðs af, það er mikil sérfræðiþekking innan beggja félaga og áfram verður lögð áhersla á upplýsingaþjónustu sem byggir á nýjustu tækni,“ segir Sigríður Margrét Oddsdóttir, forstjóri Já í tilkynningu.

Einar Einarsson, framkvæmdastjóri Gallup, segir kaupin stórt skref fram á við fyrir starfsemi og starfsmenn Gallup. „Umhverfi fyrirtækja er síbreytilegt og ekki síst ef litið er til tækni og þróunar sem átt hefur séð stað í upplýsingageiranum. Með kaupum Já er Gallup orðið hluti af sterku fyrirtæki með skýrar áherslur á rannsóknir og upplýsingar,“ segir Einar.