Símaskráin 2015 komin í dreifingu

Símaskráin 2015 er komin í dreifingu og er útgáfa hennar að þessu sinni í samstarfi við Félag heyrnarlausra. Markmið samstarfsins er að vekja athygli á táknmáli fyrir Íslendinga.

Í símaskránni er meðal annars að finna fræðslukafla sem inniheldur algengustu tákn á táknmáli auk ýmissa táknmálstákna víðs vegar í skránni.

Tvíburar á mismunandi aldri prýða þrjár útgáfur af forsíðu símaskrárinnar og á að endurspegla tvenndina í símanúmerinu 1818 sem tók formlega við af 118 nú í byrjun maí.

Á höfuðborgarsvæðinu verður Símaskráin 2015 aðgengileg á morgun í verslunum Símans, Vodafone og Tals, afgreiðslustöðvum Póstsins, verslunum Nettó og á skrifstofum Já í Glæsibæ og á Stórhöfða.

Á landsbyggðinni verður hægt að nálgast Símaskrána frá og með morgundeginum á afgreiðslustöðvum Póstsins, í verslunum Símans, Vodafone og Tals á Akureyri, Skrifstofu Já Iðavöllum 12a í Reykjanesbæ og verslunum Nettó á Akureyri, Egilsstöðum, Borgarnesi og Selfossi.

Símaskráin er að fullu endurvinnanleg og hægt er að skila henni í grenndargáma, á endurvinnslustöðvar eða setja hana í bláu tunnuna.