Liverpool að landa samningum við Skrtel og Ibe

Samkvæmt fréttavef Sky Sports er Liverpool nálægt því að ganga frá nýjum samningum við þá Martin Skrtel og Jordan Ibe.

Skrtel á eitt ár eftir af sínum samningi en hann er 30 ára gamall. Hinn nítján ára Ibe er með samning við félagið nú sem gildir til 2017.

Jordan Henderson er við það að ganga frá nýjum fimm ára samningi við Liverpool en þeir Philippe Coutinho og Daniel Sturridge hafa þegar skrifað undir nýja langtímasamning við félagið.

Skrtel hafði verið orðaður við bæði Wolfsburg og Napoli og sagði sjálfur að hann væri ekki á leið frá Liverpool.

Ibe var í láni hjá Derby fyrir áramót og en miklar vonir eru bundnar við hann hjá forráðamönnum Liverpool.

Viðræður við Raheem Sterling eru hins vegar á bið sem stendur en hann hafnaði á dögunum samningstilboði frá Liverpool líkt og fjallað hefur verið um.