Hvað þýða "emoji“ karlarnir á Snapchat?

Nýjasta uppfærsla Snapchat forritsins hefur verið milli tannanna á fólki að undanförnu. Við hliðina á nöfnum í vinalistanum hafa svokallað emoji kallar tekið upp á því að birtast og margir velt því fyrir sér hvað þeir tákna. Svarið er það að kallarnir hafa tekið við af Top Friends til að sýna fólki hvar það er statt á vinalista annarra.

Karlarnir eru alls sex. Hjarta við hlið nafns einhvers þýðir að þið eruð efstir á vinalista hjá hvor öðrum en sá sem gnístir tönnum táknar að besti vinur þinn er besti vinur einshvers annars. Margir hafa haft á orði að það sé versti karlinn. 

Sólgleraugnakarlinn táknar að einhver af þínum bestu vinum hefur þann notanda sem sinn besta vin en venjulegur broskarl táknar að þið eruð ofarlega á lista hvors annars þó hvorugur nái þeim stalli að vera sá besti.

Karlinn með skítaglottið táknar að annarhvor ykkar er með hinn sem besta vin á meðan hinn hefur aldrei fyrir því að svara. Sá er einna líklegastur til að valda sambands- eða vinaslitum. Að endingu ber að nefna að eldurinn táknar að þú og viðtakandinn hafið verið duglegir að senda snöpp á milli ykkar síðustu daga.

Ari Eldjárn kann ekki á Snapchat

Björn Bragi Arnarsson, Gettu Betur spyrill og meðlimur uppistandshópsins Mið-Íslands, er einn þeirra sem notar samskiptaforritið talsvert. Við fengum hann því til að sýna myndrænt hvernig vinalisti hans lítur út um þessar mundir.

„Til að byrja með er rétt að nefna það að Ari er eins og amma manns á Snapchat. Ég held hann kunni ekki einu sinni að opna það,“ segir Björn Bragi. „Enda er ég fyrir löngu hættur að senda honum stakan hlut.“ Allir sem vilja getað bætt Birni á vinalista sinn en hann snappar undir nafninu bjornbragi.

„Við Jói sendum hvor öðrum reglulega hluti enda þykir mér vænt um hann og sakna hans ef ég sé hann ekki með reglulegu millibili. Dóri greyið hætti síðan á Snapchat um daginn af því enginn sendi honum neitt. Okkur tókst samt að gabba hann í að byrja aftur og sendum honum öðru hvoru línu til að halda honum góðum.“

Fjórmenningarnir mynda Mið-Ísland hópinn en sýning þeirra, Lengi lifi Mið-Ísland, hefur gengið fyrir nærri fullu húsi síðan í janúar og yfir 10.000 manns séð sýninguna. Margir gestir hafa aðstoðað við sýninguna en þeirra á meðal má nefna Önnu Svövu Knútsdóttur, Sögu Garðars, Þorstein Guðmundsson og Berg Ebba Benediktsson. 

Síðustu sýningarnar voru að fara í sölu en nú um helgina verður kanadískur uppistandari með hópnum. Sá heitir Tom Shillue og hefur meðal annars komið fram hjá Jimmy Fallon og Conan O‘Brien.

Að auki fylgir nýjustu uppfærslunni sá kostur að velja stillingu sem nemur betur myndefni í lélegri lýsingu. Að er nú hægt að sjá hvaða vini á Snapchat þú hefur vanrækt að undanförnu og rétt er að íhuga að senda þeim eitthvað á næstunni.