Arnór með fimm mörk í sigri Bergischer | Níu íslensk mörk í sigri Aue

Arnór Þór Gunnarsson skoraði fimm mörk þegar Bergischer vann tveggja marka sigur, 28-30, á Minden á útivelli í þýsku Bundesligunni í handbolta í kvöld.

Björgvin Páll Gústavsson stóð í marki Bergischer í leiknum.

Gunnar Steinn Jónsson var ekki á meðal markaskorara þegar Gummersbach vann þriggja marka sigur, 24-21, á Erlangen á heimavelli.

Austurríski hornamaðurinn Raul Santos var markahæstur í liði Gummersbach með átta mörk en Julius Kühn kom næstur með sex mörk.

Ole Rahmel skoraði mest fyrir Erlangen, eða sex mörk, en Sigurbergur Sveinsson komst ekki á blað.

Þá vann Hamburg átta marka sigur á Lübbecke, 34-26, og Lemgo og Friesenheim gerðu jafntefli, 32-32.

Í B-deildinni vann Aue þriggja marka sigur, 29-26, á 2000 Coburg.

Sigtryggur Rúnarsson - sonur þjálfarans Rúnars Sigtryggssonar - skoraði fjögur mörk fyrir Aue. Frændi hans, Árni Þór Sigtryggsson, skoraði þrjú mörk og Hörður Fannar Sigþórsson tvö.

Bjarki Már Gunnarsson og Sveinbjörn Pétursson leika einnig með Aue.