Hellisheiði og Þrengslin lokuð

Búið er að loka Hellisheiði, Þrengslum, Sandskeiði og Lyngdalsheiði. Þá er einnig lokað um Súðavíkurhlíð vegna snjóflóðahættu.

Holtavörðuheiði er opin en þar er krap og snjóþekja. Þæfingsfærð er á Bröttubrekku en þar er stórhríð. Ófært er á Fróðárheiði og hálka og skafrenningur í Svínadal. Á öðrum vegum á Vesturlandi eru hálka og hálkublettir og eitthvað um snjókomu eða éljagang.

Á Vestfjörðum er ófært á fjallvegum til Flateyrar og Suðureyrar. Þungfært er á Kleifaheiði. Súðavíkurhlíð og Raknadalshlíð eru lokaðar. Þungfært er í Ísafjarðardjúpi og einnig er orðið þungfært og stórhríð á Hjallahálsi. Þæfingsfærð er í Dýrafirði með snjókomu.

Á Norðurlandi er hálka eða snjóþekja og víða er skafrenningur eða éljagangur.

Hálka og snjóþekja er á Austurlandi og snjóþekja víða. Með suðausturströndinni er hálka, snjóþekja, hálkublettir og éljagangur.

Snjóþekja og hálka er á vegum á Suðurlandi.

Veðurhorfur næsta sólarhringinn:

Norðvestan 13-23 metrar á sekúndu víða um land í kvöld og þá snjókoma eða él norðan til, en þurrt syðra. Hægari vindur norðaustan til. Kólnandi veður. Lægir í nótt og fyrramálið. Norðlæg átt, 5-13 metrar á sekúndu um hádegi á morgun og dálítil él um landið norðanvert, annars bjart á köflum. Bætir í vind og ofankomu á Vestfjörðum og suðaustanlands annað kvöld. Frost 0 til 6 stig.