Táraðist þegar hann tilkynnti að hann væri að hætta

Bandaríski fréttagrínarinn Jon Stewart tilkynnti í þætti sínum, The Daily Show, í gær að hann myndi hætta sem þáttastjórnandi á næstu mánuðum.

Þessi vinsæli þjóðmálaþáttur hefur verið á dagskrá frá árinu 1999 og er hann sýndur um allan heim en sjónvarpstöðin Comedy Central framleiðir þáttinn.

Stewart var nokkuð tilfinningaríkur í ræðu sinni og hrósaði hann starfsfólki þáttarins í hástert og talaði um besta vinnustað í heiminum.

„Það er kominn tími á einhvern annan,“ sagði Stewart.

„Það er ekki ljóst hvenær nákvæmlega ég mun hætta, gæti verið í sumar en í síðasta lagi í september. Ég er ekki með nein sérstök plön um framtíðina en ég er með fullt af hugmyndum.“