Vanilla Ice handtekinn fyrir þjófnað

Bandaríski rapparinn og sjónvarpsmaðurinn Vanilla Ice er í klandri. Lögreglan í Florida hefur handtekið kappann og sakað hann um innbrot og þjófnað. Þetta kemur fram á vef BBC.

Vanilla Ice, sem heitir réttu nafni Robert Van Winkle, er nú stjórnandi þáttarins Vanilla Ice Project. Þar tekur hann hrörleg hús og lappar upp á þau. Alls hafa fjórar þáttaraðir verið framleiddar af þáttinum.

Winkle var að vinna í einu slíku og hefur verið sakaður um að stela úr húsi í nágrenninu. Meðal þess sem var tekið voru húsgögn og reiðhjól en þau eiga að hafa fundist heima hjá rapparanum. Sjálfur hefur hann gefið út að þetta sé allt leiður misskilningur sem muni leysast farsællega.

Þetta er ekki í fyrsta skipti sem Winkle kemst í kast við lögin en fyrir sjö árum var hann handtekinn vegna gruns um heimilisofbeldi.

Í upphafi tíunda áratugarins var hann einn þekktasti hvíti rappari heimsins en ferill hans hefur dalað talsvert síðustu ár.  Hans allra, allra þekktasti smellur er lagið Ice Ice Baby.