Pirate Bay komin upp á ný

Skráarskiptasíðan Pirate Bay var opnuð á ný í dag, meira en 7 vikum eftir að henni var lokað af sænsku lögreglunni.

Síðunni var lokað í byrjun desember en um tveimur vikum síðar var hún opnuð aftur. Engar skrár voru þá á síðunni heldur aðeins sjóræningjafáni. Stuttu síðar var byrjað að telja niður á síðunni til 1. Febrúar, auk þess sem ýmislegt annað gaf til kynna að síðan yrði opnuð aftur á morgun.

Pirate Bay var svo opnuð í dag, degi á undan áætlun. Svo virðist sem fáar skrár hafi tapast við það að síðunni var lokað af lögreglunni, að því er fram kemur í frétt Torrent Freak.