Af hverju var sófinn alltaf laus fyrir fólkið í Friends?

Vinirnir í Friends njóta enn gífurlegra vinsælda um allan heim. Þættirnir eru nú fáanlegir í gegnum Netflix-þjónustuna og hafa því margir um allan heim tekið sig til og horft á þættina frá upphafi til enda.

Þegar einn glöggur aðdáandi þáttanna horfði á þá tók hann eftir einhverju sem fáir höfðu áður séð. Aðdáandinn leysti ráðgátuna um það af hverju Ross, Rachel, Phoebe, Moica, Joey og Chandler fengu alltaf sæti í sófanum. Aðdáandinn tók nefnilega eftir merki sem á stóð „Reserved“ sem íslenskast sem „frátekið“.

Tanya Ghahremani tók eftir þessu og skrifaði um þetta á vefsíðuna Bustle. Hún er sjálf frá New York, eins og fólkið í Friends, og segir frá því að það sé mjög erfitt að ná sér í svona góð sæti á kaffihúsi svona oft. „Það er bara óraunverulegt að maður fái alltaf sætið sitt, þegar maður kemur inn á svona stað," skrifar hún.

Þess vegna þótti henni afar gott að uppgvöta að sófinn var í mörgum tilvikum frátekinn þeim í Friends.

Hún valdi nokkra þætti úr mismunandi seríum af handahófi og sýndi fram á að í flestum tilvikum er borðið og sófinn frátekinn fyrir okkar fólk, aðalpersónurnar í Friends. Reyndar muna flestir aðdáendur þáttanna eftir einu skipti sem einhverjir leiðindapésar settust í sófann og neituðu að færa sig.

Hér að neðan má sjá nokkrar myndir sem sýna merkið.