Lögreglumaður á meðal þeirra fyrstu samkynhneigðu til að giftast í Flórída

Lögreglumaðurinn David Currie og Aaron Woodard voru fyrstu samkynhneigðu mennirnir til að giftast löglega í Flórída-fylki í Bandaríkjunum. Þeir giftu sig skömmu eftir miðnætti á þriðjudaginn í síðustu viku, eingöngu nokkrum mínútum eftir að lög um hjónaband samkynhneigðra tóku gildi.

Eins og sjá má á meðfylgjandi mynd var Currie í lögreglubúningi sínum, en hann starfar sem rannsóknarlögreglumaður.

„Þetta er æðisleg tilfinning," segir Currie í samtali við Miami Herald og bætir við:

„Ég er ekki eingöngu spenntur mín vegna, heldur einnig vegna þess hvað þetta hefur mikla þýðingu fyrir fylkið í heild sinni. Fyrir fólk sem hefur átt feril eins og ég, þar sem það þykir ekki í lagi að vera samkynhneigður, þar sem það er ekki samþykkt."

Hann sagðist hafa beðið yfirmenn sína í lögreglunni um leyfi til þess að fá að vera í búningnum. „Þegar hermenn gifta sig þá eru þeir gjarnan í sínum búningum. Því spurði ég hvort ég mætti vera í mínum."

Scott Israel, yfirmaður Currie, sagðist hafa verið stoltur af Currie og samþykkti beiðnina á staðnum, að Currie myndi klæðast lögreglubúningi.

Þeir Currie, sem er fimmtugur, og Woodard, sem er 33 ára, kynntust í Fort Lauderdale fyrir ári síðan. Þeir hafa verið samþykktir sem fósturforeldrar og hyggjast ættleiða börn á næstu misserum.

Hér að neðan má sjá sjónvarpsfrétt um hjónabönd samkynhneigðra í Flórída.