Krefjast þess að staðið verði við loforð um þjóðaratkvæði

Aðstandendur útifundanna á Austurvelli vorið 2014 krefjast þess í tilkynningu að staðið verði við loforð um þjóðaratkvæðagreiðslu um framhald aðildarviðræðna við Evrópusambandið.

„Fyrir alþingiskosningarnar 2013 lofuðu flestir ráðherrar ríkisstjórnar Sigmundar Davíðs þjóðaratkvæðagreiðslu um áframhald aðildarviðræðna við Evrópusambandið.  Eftir kosningarnar ákvað ríkisstjórnin hins vegar að standa ekki við loforðið og lagði fram frumvarp um að umsókn Íslands yrði afturkölluð.“

Í tilkynningu segir að ákvörðunin hafi vakið mikla reiði og þúsundir lagt leið sína á Austurvöll þar sem þeir kröfðust þess að stjórnmálamenn stæðu við orð sín. „Eins kom fram í skoðanakönnunum að 82% landsmanna vildu taka ákvörðun um málið í þjóðaratkvæðagreiðslu og 53.555 Íslendingar skrifuðu undir áskorun þar um til ráðamanna.

Þessi miklu viðbrögð endurspegluðu megna óánægju Íslendinga með meðhöndlun málsins. Almenningur reis með afgerandi hætti upp gegn ríkisstjórninni og skilaboðin voru skýr og afdráttarlaus. Að lokum hætti stjórnin við að afgreiða frumvarpið um afturköllun umsóknar.

Það eru mikil vonbrigði að sjá ríkisstjórnina undirbúa sams konar tillögu, um afturköllun umsóknar, á nýju ári. Því verður svarað fullum hálsi; ríkisstjórn sem gengur gegn vilja þjóðarinnar, er ekki ríkisstjórn þjóðarinnar.

Formaður Sjálfstæðisflokksins lofaði því, fyrir alþingiskosningarnar 2013, að þjóðaratkvæðagreiðslan skyldi fara fram á fyrri hluta kjörtímabilsins. Hann getur enn staðið við loforðið með því að leggja fram frumvarp um þjóðaratkvæðagreiðslu fyrir 27. janúar (boða þarf til kosninga með þriggja mánaða fyrirvara).

Við krefjumst þess, nú sem áður, að ríkisstjórn Sigmundar Davíðs falli frá áformum um að afturkalla umsóknina og standi við loforðið um þjóðaratkvæðagreiðslu,“ segir í tilkynningunni, en undir hana rita „aðstandendur útifundanna á Austurvelli vorið 2014“.