Snorri með stórleik í tapi Nimes

Paris Saint-Germain bar sigurorð af Nimes, 36-32, í 1. umferð frönsku úrvalsdeildarinnar í handbolta í kvöld.

Snorri Steinn Guðjónsson átti stórleik í sínum fyrsta deildarleik með Nimes og skoraði 12 mörk úr aðeins 16 skotum. Snorri var ískaldur á vítalínunni og nýtti öll sjö vítaköst sín.

Ásgeir Örn Hallgrímsson gerði þrjú mörk fyrir Nimes sem var fjórum mörkum undir í hálfleik, 21-17.

Mikkel Hansen dró vagninn hjá PSG en danska stórskyttan skoraði 14 mörk, þar af níu af vítalínunni.

Daniel Narcisse kom næstur með átta mörk en hann gaf auk þess fimm stoðsendingar. Róbert Gunnarsson komst ekki á blað hjá frönsku meisturunum.