Funda vegna skjálfta í Bárðarbungu

Aukin jarðskjálftavirkni í og við Bárðarbungu á síðastliðnum tveimur vikum verður rædd á fundi vísindamannaráðs Almannavarna í dag. Þar bera vísindamenn saman bækur sínar þar sem hugsanlegar ástæður hennar verða ræddar.

Samkvæmt upplýsingum frá Veður­stofu Íslands hefur smáskjálftum á svæðinu fjölgað nokkuð – en mikil smáskjálftavirkni var á svæðinu dagana og vikurnar eftir að eldgosinu í Holuhrauni lauk. Úr henni dró jafnt og þétt en hún hefur aukist aftur með tveimur jarðskjálftum sem mældust yfir þrjú stig – 3,1 í síðustu viku og 3,2 um miðjan dag á mánudag.

Eldgosið í Holuhrauni stóð í hálft ár – hófst þann 31. ágúst 2014 og goslok voru tilkynnt 28. febrúar síðastliðinn. Fjöldi mælitækja er við eldstöðina vegna verkefnisins FutureVolc, en umbrotin voru skráð af nákvæmni af vísindamönnum verkefnisins.