Hvenær kysstu félagar Igropulo bikarinn?

Rússinn Konstantin Igropulo stal senunni eftir að Füchse Berlin tryggði sér EHF-bikarinn í gær.

Hann lét taka mynd af sér inn í búningsklefa eftir leikinn þar sem hann er nakinn en bikarinn felur hans allra heilagasta.

Nokkur umræða hefur sprottið á Twitter um það hvort félagar hans hafi mikið verið að kyssa bikarinn eftir að Rússinn lét taka myndina af sér.

Nokkrir þeirra létu líka mynda sig með bikarinn inn í klefa en þeir voru þó í fötunum. Á meðal þeirra var Petar Nenadic sem sést á myndinni með Igropulo hér að ofan. Hvort hann tók myndina á undan eða eftir að Igropulo fækkaði fötum hefur ekki enn fengist svar við.