Blinduð af fjölskyldutengslum og segist ekki hafa kúgað forsætisráðherra

Malín Brand, blaðamaður á Morgunblaðinu, fullyrðir að hún hafi ekki komið nálægt tilraun til að kúga fé af forsætisráðherra. Hún var handtekin ásamt systur sinni í Hafnarfirði á föstudaginn eftir umfangsmiklar aðgerðir lögreglu. 

Vísir greindi frá atburðarásinni í morgun. Síðar í dag lýsti lögregla því yfir að systurnar hafi játað aðild sína að málinu. Málið teldist að mestu upplýst og að lokinni rannsókn verði það sent til ríkissaksóknara sem taki ákvörðun um næstu skref.

Malín Brand er í tímabundnu leyfi frá störfum á Morgunblaðinu. Hún greindi frá aðild sinni að tilrauninni til fjárkúgunarinnar á hendur forsætisráðherra í samtali við Vísi í dag og sagðist hafa blandast í atburðarrás sem hún  hvorki skipulagði né tengdist á nokkurn hátt nema fjölskylduböndum.

Hún fullyrðir að hún hafi ekki komið nálægt bréfasendingunni og sjálfri fjárkúguninni. Hún harmar að hafa blandast inn í málið. „Kjarni málsins er að þarna blandast ég inn í atburðarás sem ég hvorki skipulagði né tengdist nokkurn hátt nema fjölskylduböndum.“

Kom flatt upp á mig

Malín segist ekki hafa trúað því að nokkur tæki bréf systur sinnar alvarlega.

„Þetta kom eiginlega flatt upp á mig vegna þess að ég bjóst ekki við að það sem hún væri að gera, að einhver myndi virkilega taka mark á því,“ segir hún.

Hún sagðist hafa beðið í bílnum á meðan hún ætlaði að athuga hvort ætlunarverk sitt hafi tekist.

„Ég bíð í bílnum á meðan hún ætlar að athuga hvort sitt ætlunarverk hafi tekist en þegar ég sé í hvað stefnir þá ætla ég bara að keyra í burtu, því þetta var ekki það sem ég hafði hugsað mér,“ segir hún.

Játaði fyrir lögreglu

Malín segir daginn hafa farið öðruvísi en hún ætlaði sér. Hún  hafði ráðgert að hafa það gott með syni sínum eftir skóla en var handtekin fyrir aðild að sakamáli.

„Þessi dagur sem ég vakna og ætla að njóta mín í vaktafrí og fara að gera eitthvað skemmtilegt með syni mínum eftir skóla; hann breyttist úr því yfir í að vera handtekin fyrir að vera í bíl með systur minni og allt í einu er ég orðinn aðili að sakamáli,“

Hún segist ekki hafa neitt að fela og hafi játað fyrir lögreglu að hafa farið með systur sinni á vettvang.

Hún segist hafa játað fyrir lögreglunni að hafa haft vitneskju um málið og að hafa ekið systur sinni í Hafnarfjörð til að sækja fjármunina strax í fyrstu skýrslutöku.

„Ég hef ekkert að fela. Ég er búin að játa fyrir lögreglunni að það hafi verið heimskulegt að fara í þennan gjörning af því að ég hefði mátt vita betur.

Blinduð af fjölskyldutengslum

Hún segist hafa verið blinduð af fjölskyldutengslum.

„Á þessu augnabliki horfir maður á lífið sitt, sem maður er búinn að byggja upp og hafa mikið fyrir, að vera góður blaðamaður og standa sig í vinnu og vera trúverðugur, eiga traust fólks, eins og ég hef átt, yfir í það að vera einhvern veginn höfð að fífli. Dálítið blindaður af fjölskyldutengslum,“ segir Malín um handtökuna og bætir við: „Allt í einu er mannorðið bara farið af því að maður blandaðist inn í vitleysu.“

Sigmundur Davíð Gunnlaugsson neitaði viðtali við Stöð 2 um málið, aðstoðarmaður hans Jóhannes Þór Skúlason sagði ekki hægt að ræða um öryggismál forsætisráðherra. Síðar um daginn sendi hann frá sér yfirlýsingu um málið. Í henni greinir hann frá því að hótunarbréfið hafi borist fyrir fáeinum dögum á heimili hans stílað á eiginkonu hans. Í því hafi falist hótun um að birtar yrðu opinberar upplýsingar sem myndu reynast skaðlega.