Skilur ekkert hvað þeir segja en elskar Horfðu til himins

„Ég er mjög, mjög spenntur,“ segir Kanadamaðurinn Michael Gnat sem ferðast til Íslands gagngert til þess að sjá sína uppáhaldshljómsveit, Nýdönsk, leika á tónleikum.

„Síðastliðinn ágúst var ég á Íslandi ásamt dóttur minni vegna þess að Sinfóníuhljómsveitin okkar frá Toronto var að spila í Hörpunni og mig langaði til þess að sjá hana,“ segir hann þegar hann er spurður að því hvernig hann komst í kynni við hljómsveitina.

„Þá helgi var einmitt Menningarnótt. Við vorum að rölta um Reykjavík og fengum okkur kvöldverð. Þegar við höfðum lokið við að borða löbbuðum við framhjá tónleikunum á Arnarhóli,“ segir Gnat hress.

„Við náðum seinasta hluta tónleika Nýdanskra. Ég féll strax fyrir tónlistinni þeirra og fór til öryggisvarðarins og spurði hann hverjir þetta væru. Hann svaraði að þetta væri hljómsveitin Nýdönsk og ég sagði honum að hann yrði að skrifa þetta niður.“ Í kjölfarið varð Gnat sér út um tvo geisladiska með hljómsveitinni og hefur hlustað viðstöðulaust á þá síðan.

„Ég hef enga hugmynd um hvað þeir eru að segja en ég elska tónlistina,“ segir hann og hlær. Úr varð að Gnat kom sér í samband við Nýdönsk og mætir í kjölfarið á tónleika sveitarinnar í Hljómahöll í kvöld.

„Mér finnst þetta þrælmagnað alveg því þetta kostar kappann sjálfsagt morð fjár. Við ákváðum þó að bjóða honum á tónleikana í Hljómahöllinni – svona til að sýna lit,“ segir Jón Ólafsson, hljómborðsleikari Nýdanskra.

Tónleikarnir eru liður í tónleikaröð sveitarinnar sem þeir nefna Nýdanska daga en þeir hófu leikinn í Bæjarbíó síðastliðna helgi og munu á næstu vikum heimsækja Siglufjörð, Akureyri og Akranes. 

„Nýdanskir dagar innihalda tónleika hljómsveitarinnar, opinbera heimsókn til bæjarstjóranna og loks fáum við atriði frá Tónlistarskólum hvers bæjarfélags fyrir sig og krakkarnir koma fram á tónleikunum hjá okkur,“ segir Jón Ólafsson en hljómsveitin mun hitta Gnat í fyrsta sinn augliti til auglitis á tónleikunum.

Uppáhaldslög Gnats eru Flugvélar, Horfðu til himins og Nýr maður af disknum Diskó Berlín. „Ég vildi óska að ég gæti borið nöfnin fram en ég kann bara að segja takk og brennivín,“ segir hann hress að lokum.

Tónleikarnir hefjast klukkan níu í kvöld í Hljómahöll.