Sigmundur Már dæmir tvo leiki á tveimur dögum í Eistlandi

FIBA-dómarinn Sigmundur Már Herbertsson er kominn til Eistlands þar sem hann verður upptekinn næstu tvö kvöld.

Sigmundur Már Herbertsson mun dæma tvo leiki í tveimur keppnum, þann fyrri í FIBA Europe Cup karla í kvöld og þann seinni í Evrópukeppni kvenna annað kvöld.

Sigmundur dæmir leik eistneska liðsins Tartu University Rock og ETHA Engomi frá Kýpur í kvöld en leikurinn er í L-riðli FIBA Europe Cup karla.

Eistarnir eru í baráttu um að komast upp úr riðlinum, hafa unnið 2 og tapað 2 eins og Juventus Utena frá Ítalíu. Kýpverska liðið situr hins vegar á botninum og hefur ekki unnið leik.

Á morgun miðvikudag dæmir Sigmundur svo leik Eista og Hollendinga í undankeppni EuroBasket kvenna 2017. Í fyrstu umferðinni á laugardag unnu Hollendingar Króata en Eistar töpuðu fyrir Frökkum.

Meðdómarar Sigmundar eru Andrei Sharapa frá Hvíta-Rússlandi og Marko Vladic frá Austurríki. Eftirlitsmaður er Klaus Metzger frá Þýskalandi.

Sigmundur Már mun síðan drífa sig heim til Íslands þar sem hann dæmir leik Grindavíkur og KR í áttundu umferð Domino´s deild karla.

Sigmundur Már Herbertsson dæmdi á Eurobasket í Lettlandi síðasta sumar og stóð sig mjög vel. Hann hefur síðan fengið fleiri verkefni í Evrópukeppnunum í vetur og hefur verið flottur fulltrúi íslensks körfubolta.