Kvikmyndahátíð framhaldsskóla í fyrsta sinn

Kvikmyndahátíð framhaldsskólanna verður haldin í fyrsta skipti sjöunda febrúar á næsta ári. Undirbúningur fyrir hátíðina er nú í fullum gangi.

„Þetta er í fyrsta skipti sem hátíðin er haldin og vonandi verður þetta árlegur viðburður,“ segir Benedikt Snær Gylfason hátíðarstjóri sem ásamt Bjarka Þór Ingimarssyni hefur staðið í ströngu við að skipuleggja hátíðina auk fleiri nemenda við Fjölbrautaskólann við Ármúla.

Hugmyndin að hátíðinni vaknaði í áfanga í skólanum sem heitir Hátíðaráfangi 103 og er kenndur af Þór Elís Pálssyni.

Benedikt segir ferlið hafa gengið vel og að hátíðinni hafi borist fjöldi mynda. Keppt verður í stuttmyndaflokki en frjálst er að senda fleiri tegundir af efni inn, til dæmis auglýsingar eða tónlistarmyndbönd.

„Ég var að gera snjóbrettamyndbönd og hægt og rólega kviknaði áhuginn á þessu,“ segir Benedikt spurður að því hvernig áhugi hans á kvikmyndagerð hafi kviknað.

Öllum framhaldsskólanemum er frjálst að senda inn efni á hátíðina en hægt er að gera það í gegnum heimasíðu hennar, Filmfestival.is.