77 milljóna tap hjá Keiluhöllinni í fyrra

Tap af rekstri Keiluhallarinnar nam 77 milljónum króna á síðasta ári samkvæmt samandregnum ársreikningi félagsins.

Rekstrarhagnaður fyrir afskriftir og fjármagnsliði nam hins vegar tæplega 42 milljónum króna. Árið áður nam tap ársins 34,7 milljónum króna en rekstrarhagnaður fyrir afskriftir og fjármagnsliði nam 39,2 milljónum króna.

Eignir félagsins nema tæplega 740 milljónum króna en skuldirnar nema tæplega 652 milljónum króna. Eigið fé er því um það bil 88 milljónir króna. Helstu eignir félagsins eru fasteignir sem eru bókfærðar á rúmar 549 milljónir króna, bifreiðar á níu milljónir króna og áhöld og tæki á 59 milljónir. Í ársreikningnum segir að á meðal viðskiptaskulda séu gjaldfallnar skuldir við birgja, en ekki hafi verið færðir dráttarvextir inn í reikningsskilin.