Áform Norðuráls í Helguvík hafa ekki breyst

„Staðan er alveg óbreytt. Álmarkaðir hafa verið góðir að okkar mati og við viljum endilega klára þetta verkefni sem fyrst,“ segir Ágúst Hafberg, framkvæmdastjóri viðskiptaþróunar hjá Norðuráli, um þau áform fyrirtækisins að reisa álver í Helguvík.

Í spá Seðlabankans um efnahagshorfur til næstu þriggja ára, sem birtist í nýrri útgáfu Peningamála í gær, kemur fram að bankinn gerir ekki lengur ráð fyrir að framkvæmdir við fyrsta áfanga álversins hefjist á tímabilinu. Seðlabankinn hefur reiknað með framkvæmdunum síðustu ár en horfir nú eingöngu til byggingar þriggja kísilvera við mat á áhrifum fjárfestinga í orkufrekum iðnaði.

„Seðlabankinn gerir sínar spár og við getum ekki svarað fyrir þær,“ segir Ágúst.

Hann segir því enn stefnt að byggingu 270 þúsund tonna álvers í Helguvík. Fyrsta skóflustungan var tekin í júní 2008 og í kjölfarið var farið í framkvæmdir á svæðinu. Þar hefur ekkert gerst frá síðustu áramótum og spilar þar meðal annars inn í ágreiningur um raforkuverð. Verkefnið hefur þegar kostað yfir fimmtán milljarða króna.

„Við viljum tryggja orku fyrir 180 þúsund tonna álver áður en við höldum lengra. En við viljum helst geta farið upp í 270 þúsund tonn og þá þurfum við 300 megavött af raforku og við erum með samninga við HS Orku og Orkuveitu Reykjavíkur,“ segir Ágúst.

Komið hefur fram að HS Orka vill losna undan orkusölusamningi við Norðurál. Samkvæmt hálfsársuppgjöri HS Orku, sem birt var fyrr í þessum mánuði, hefur fyrirtækið hafið gerðardómsferli til að losna undan samningnum en hann var undirritaður í apríl 2007.

„Það kom okkur dálítið á óvart enda er þarna aftur verið að reka sama málið og var rekið fyrir tveimur til þremur árum. Þeir vefengdu gildi samningsins og það fór fyrir gerðardóm og hann var dæmdur í fullu gildi. Þetta gæti hins vegar tafið framkvæmdina því svona málaferli geta tekið eitt og hálft ár. En ef þetta á að gerast hratt er ljóst að eitthvert annað fyrirtæki en HS Orka þarf að koma inn í þetta.“

Spurður af hverju Norðurál vilji þá ekki losa HS Orku undan samningnum segir Ágúst orkufyrirtækið þurfa að standa við hann.

„Þetta snýst bara um það. Orkuveita Reykjavíkur byrjaði að afhenda sína orku árið 2011 og við höfum notað hana í álverinu á Grundartanga við framleiðsluaukninguna þar,“ segir Ágúst.