Orkuveitan og undanþágur

Brennisteinsvetni H2S er litlaus eitruð lofttegund, oft tengd við hveralykt og jarðhita. Þessi lofttegund hefur verið að plaga okkur nágranna Hengilssvæðisins í auknum mæli undanfarin ár. Í stórum skömmtum er hún banvæn og getur drepið á stuttum tíma. Við þolum litla skammta af brennisteinsvetni en hversu lítið og hversu lengi er ekki vitað með vissu.

Uppsprettur þessarar lofttegundar eru jarðvarmavirkjanir Orkuveitunnar á Hengilssvæðinu. Í fyrra blésu þessar tvær virkjanir út 30 þúsund tonnum af brennisteinsvetni og frá 2003 samtals 198 þúsund tonnum. Hluti af þessu brennisteinsvetni fer yfir Lækjarbotna þar sem börnin mín ganga í skóla. Þetta sama brennisteinsvetni fer yfir höfuðborgarsvæðið þar sem önnur börn ganga í skóla.

Styrkur brennisteinsvetnis hefur aukist eftir að Hellisheiðarvirkjun hóf starfsemi sína haustið 2006. Hluti af brennisteinsvetninu breytist yfir í brennisteinsdíoxíð og brennisteinssýru, sem sumir þekkja ef til vill sem súrt regn og hefur oft verið tengt við kolaorkuver. Brennisteinssýra tærir málma og eyðir lífi. Á áttunda áratugnum urðu til að mynda skógar á Norðurlöndunum fyrir barðinu á súru regni sem barst frá Bretlandseyjum þegar Bretar notuðu meira kol en þeir gera nú.

Veldur okkur skaða

Þessi lofttegund brennisteinsvetni er að valda okkur skaða; fjárhagslegum og heilsufarslegum. Af hennar völdum ryðgar bárujárn hraðar, það fellur á silfur, ýmiss konar raftæki bila, möstur endast skemur og fleira. Það kostar okkur að endurnýja hluti hraðar. Það eru vísbendingar um að brennisteinsvetnið geti í litlum skömmtum haft áhrif á astma og á taugakerfi manna. Þörf er á fleiri rannsóknum. Á meðan er gerð tilraun á heilsu okkar.

Orkuveita Reykjavíkur vill fá undanþágu frá því að uppfylla hertari mörk um útblástur brennisteinsvetnis. Þeir eru í vandræðum með brennisteinsvetnið. Þegar Hellisheiðarvirkjun var byggð var engin krafa gerð í starfsleyfinu um að hreinsa brennisteinsvetnið, ekki stafur um hreinsibúnað. Þetta átti líklegast að reddast, rigna niður eða fjúka burt.

Nú eru átta ár liðin og enn streymir brennisteinsvetnið óhindrað yfir nágranna Hengilssvæðisins. Orkuveitan vill fá meiri tíma, meiri tíma til að þróa áfram nýja lausn sem á að leysa stærsta umhverfisvandamál þeirra, brennisteinsvetnið. SulFix heitir verkefnið og í því felst að brennisteinsvetninu er dælt aftur niður í jarðlögin. Þessi lausn er ódýrari en staðlaður hreinsibúnaður sem felst jafnan í efnafræðilegri útfellingu á brennisteinsvetni.

Orkuveitan hefur beðið umhverfisráðherra að veita sér frest. Fá undanþágu frá reglugerð. Bara fimm ár í viðbót og þá verður þetta búið…?

Hversu lengi eigum við að bíða eftir því að Orkuveitan hreinsi andrúmsloftið okkar? Hvað ef SulFix er ekkert fix? Hvað kostar hvert tonn af brennisteinsvetni okkur?