„Þær eru ótrúlegar þessar Hringskonur“

„Þetta er mjög mikilvægt fyrir starfsemi Sjónarhóls, ekki síst á þessum tímum. Algerlega ómetanlegt,“ segir María Hildiþórsdóttir, framkvæmdastjóri Sjónarhóls, um ákvörðun Kvenfélagsins Hringsins um að veita fimm milljónir á ári til reksturs Sjónarhóls ráðgjafamiðstöðvar næstu þrjú árin. En samningur um það var undirritaður nýlega.

Hringurinn hefur verið einn af dyggustu bakhjörlum Sjónarhóls frá upphafi. „Þær eru ótrúlegar þessar Hringskonur,“ segir María.

„Að þær skuli með handverki sínu geta gert allt það sem þær gera í þágu barna.“

Sjónarhóll veitir foreldrum barna með sérþarfir ráðgjöf og stuðning. Til hans geta foreldrar leitað með börn sín á öllum aldri með margvísleg vandamál. Þar getur verið um að ræða mál tengd skólagöngu barnsins, þörf fyrir stuðningsúrræði, félagslega erfiðleika og margt fleira. Þjónustan er endurgjaldslaus og ekki er þörf fyrir tilvísun eða greiningu.