Ný fjölskyldumeðferð á BUGLi

Hluta af húsnæði barna- og unglingageðdeildar Landspítalans hefur verið breytt í fjölskylduíbúð, með sjö milljóna króna styrk frá kvenfélaginu Hringnum. „Þessi íbúð er kölluð Hringsíbúðin,“ segir Valgerður Einarsdóttir, formaður Hringsins. „Barna- og unglingageðdeild sendi inn styrkbeiðni fyrir einhverju síðan fyrir þessari íbúð. Við svöruðum því játandi. Í fjölskylduíbúðinni verður boðið upp á nýja tegund meðferðar, sem er fjölskyldumeðferð í gegnum leik og aðra jákvæða samveru,“ segir Valgerður.

Í íbúðinni rúmast heil fjölskylda. „Barnið sem er veikt fær fjölskylduna sína inn á deildina. Ég held það hafi verið ráðgert að fjölskyldur dvelji viku og viku í íbúðinni. En það er ekki komin reynsla á það. Þessi meðferð er bara rétt að fara af stað og þetta verður örugglega aðlagað eftir þörfum. Þetta er nýjung í meðferð sem þau eru að fara af stað með. Þetta á að hefjast undir eins. Það eru spennandi tímar fram undan. Mjög gott samstarf hjá starfsfólkinu á barna- og unglingageðdeild.“

Arkitektar og smiðir voru fengnir í verkið. „Þeir eru búnir að vera í einhverja mánuði að koma þessu fyrir. Þetta er afskaplega notaleg og flott lítil íbúð. Hún var formlega afhent 6. febrúar og er tilbúin til notkunar,“ segir Valgerður.

Kvenfélag Hringsins var stofnað árið 1904. „Það er sennilega næstelsta góðgerðarfélag landsins. Thorvaldsensfélagið er það elsta. Árið 1942 breyttist markmið Hringsins í það að hér skyldi byggður barnaspítali. Árið 2003 tók hann til starfa í nýrri byggingu, en hann hafði verið í öðru formi inni á Landspítalanum áður. Starfið hefur verið farsælt og gefandi. Það eru duglegar konur í félaginu,“ segir Valgerður, en hún hefur gegnt formennsku í samtökunum í fimm ár.

Félagið styrkir ýmis líknar- og mannúðarmál ár hvert, sérstaklega í þágu barna. Í forgangi er Barnaspítali Hringsins. „Við styrktum hann um 110 milljónir þar síðast. En allt frá upphafi hefur Hringurinn stutt barna- og unglingageðdeild með ýmsum hætti. Það hefur verið okkur hjartans mál, alveg frá því að hún var opnuð árið 1971. Á barna- og unglingageðdeild er ekki þörf á lækningatækjum, en við styrkjum meðferð eftir þörfum. Til dæmis styrktum við endurbætur á garði við deildina síðast,“ segir Valgerður.

Hringurinn selur jólakort, jólakaffi, happdrættismiða og fleira til að fjármagna styrkina. „Svo rekum við veitingastofu á Barnaspítala Hringsins og höldum jólabasar. Auk þessa starfs fáum við gjafir. Við eigum afskaplega marga og góða velunnara í þjóðfélaginu sem styrkja okkur og styðja,“ segir Valgerður.