Hatursorðræða á netinu

Alþjóðlegi netöryggisdagurinn verður haldinn hátíðlegur í ellefta sinn í dag. Í tilefni dagsins stendur SAFT, Samfélag, fjölskylda og tækni, sem er vakningarátak um örugga og jákvæða tölvu- og nýmiðlanotkun barna og unglinga á Íslandi, fyrir ráðstefnu í Skriðu, aðalbyggingu Menntavísindasviðs Háskóla Íslands við Stakkahlíð, frá tólf á hádegi til fjögur.

Ráðstefnan er haldin í samstarfi við ráðuneyti innanríkis-, velferðar- og mennta- og menningarmála, Póst- og fjarskiptastofnun og Menntavísindasvið Háskóla Íslands.

Hanna Birna Kristjánsdóttir innanríkisráðherra heldur opnunarávarp og býður gesti velkomna og Eygló Harðardóttir flytur einnig erindi. Nokkrar málstofur verða haldnar, en þær eru Ábyrgð og vernd Íslendinga á netinu, Varðveisla persónuupplýsinga og Hvernig byggjum við upp „stafræna borgaravitund“?

Margrét Steinarsdóttir er framkvæmdastjóri Mannréttindaskrifstofu Íslands og er hún ein þeirra sem flytja erindi á málstofunni um ábyrgð og vernd Íslendinga á netinu, en málstofunni stýrir Ingimar Karl Helgason blaðamaður.

„Við munum meðal annars benda á skýrslu sem Mannréttindaskrifstofa gaf út um hatursorðræðu og segja frá efni hennar. Svo munum við tala almennt um hatursorðræðu og internetið – því internetið hefur auðvitað opnað stóran vettvang fyrir ýmiss konar fordóma og hatursorðræðu,“ segir Margrét.

„Við ætlum einnig að snerta á alþjóðlega regluverkinu um internetumgengni og þau vandkvæði sem fylgja því að geta skýlt sér á bak við löggjöf annarra ríkja með því að skrá lén í ríkjum þar sem ekki er jafnstrangt regluverk um internetnotkun.“

Hún segir þetta verða örerindi en vonast til þess að líflegar umræður skapist í kjölfarið.

„Við munum ræða um tjáningarfrelsið og svo aftur takmarkanir á því vegna hatursorðræðunnar – við vonum að við komum að sem mestum upplýsingum sem við teljum að geti komið að gagni í umræðunni,“ segir Margrét.

Þemað á netöryggisdeginum í ár er Gerum netið betra, saman og munu yfir hundrað þjóðir um allan heim standa fyrir skipulagðri dagskrá þennan dag.