Persónuleg veðurspá fyrir einstaklinga

 Gunnlaugur Guðmundsson stjörnuspekingur rekur islenzkstjornuspeki.is og hannar persónuleg stjörnukort út frá veðurfari.

„Ég vil taka það fram að ég er ekki að fara í samkeppni við veðurstofuna, heldur bjóða fram þjónustu sem hún er ekki að veita,“ segir Gunnlaugur Guðmundsson stjörnuspekingur. „Í hefðbundnum veðurfréttum er í raun verið að tala um árstíðirnar og afstöðu sólar og jarðar og við erum alltaf að pæla í veðrinu.

Ég er búinn að vera atvinnumaður í faginu í 33 ár og er alltaf að gera persónuleg kort fyrir fólk. Ég uppgötvaði þó fyrir stuttu að gamla stjörnuspekin er ekkert annað en eðlisfræði fortíðarinnar svo ég ákvað að snúa þessu yfir á nútímatungumál og tala um veður,“ segir hann. Gunnlaugur bendir á að ákvarðanir fólks séu mjög háðar veðurfari og gagnsemin af persónulegri veðurspá sé sú sama og að fylgjast með veðrinu og spyrja sig spurninga.

„Þetta eykur meðvitund fólks um fjölbreytileikann þannig að maður verður meira í eins konar núvitund hvað varðar heimilið, félagslífið og praktísku málin. Raunveruleg núvitund er að vera meðvitaður um sína persónulegu orku og hvernig manni líður en veðrið hefur mikil áhrif á það. Það er bara verið að benda á hvernig orkan þín er og maðurinn hefur rfjálsan vilja til að gera hvað sem hann vill.“

Gunnlaugur getur kortlagt veðurfar næstu tólf mánuði fyrir hvern og einn samkvæmt íslenskri stjörnuspeki. Hægt er að panta þitt eigið persónulega veðurkort á islenzkstjornuspeki.is.