Orkufyrirtækið Reykjavík Geothermal (RG) hefur fengið styrk upp á 4,1 milljónir evra, um 640 milljónir íslenskra króna, vegna framkvæmda við fyrsta áfanga í verkefni fyrirtækisins í Suður-Eþíópíu. Þetta staðfestir Davíð Stefánsson forstöðumaður ráðgjafasviðs RG.

Fyrirtækið, sem er í eigu íslenskra og bandarískra fjárfesta, komst í haust að samkomulagi við ríkisstjórn Eþíópíu um að byggja og reka um eitt þúsund megavatta jarðvarmaorkuver í landinu.

Styrkurinn kemur úr sjóði sem er ætlað að styðja við jarðvarmaverkefni í Austur-Afríku sem nefnist The Geothermal Risk Mitigation Facility (GRMF). Sjóðurinn var stofnaður af framkvæmdastjórn Afríkubandalagsins (AUC), Innviðasjóði Evrópusambandsins fyrir Afríku og ráðuneyti þróunarmála í Þýskalandi, í samvinnu við þýska þróunarbankann KfW. 

„Markmið GRMF er að hvetja almenning og fjárfesta til að þróa raforkuframleiðslu með jarðhita í Austur-Afríku með því að veita styrki til rannsókna á yfirborði og borana á fyrstu borholum við leit að jarðhitaauðlindum til orkuframleiðslu. Sjóðurinn veitir styrki til að koma mönnum yfir fyrsta hjallann,“ segir Davíð og bætir því við að styrkurinn geti á endanum orðið enn hærri, eða um 5,8 milljónir evra, um níu hundruð milljónir króna. 

Verkefni RG í Eþíópíu er unnið í samstarfi við alþjóðlega fjárfesta og miðast við tvo fimm hundruð megavatta áfanga. Áætluð heildarfjárfesting hljómar upp á fimm hundruð milljarða króna. Jarðvarmaorkuverið á að rísa á svæði sem heitir Corbetti þar sem finna má virka eldstöð sem svipar til margra íslenskra eldstöðva. Davíð segir styrkinn eiga að duga fyrir að lágmarki fjörutíu prósentum af kostnaði við borun fyrstu tveggja borholanna.

„Þessi styrkur mun auðvelda upphafið að þessu stóra verki sem framundan er í Corbetti-öskjunni í Suður-Eþíópíu jafnframt því að vera viðurkenning á mikilvægi verkefnisins. Íslenskir og eþíópískir jarðvísindamenn sem hafa rannsakað svæðið telja Corbetti vera eitt besta jarðhitasvæði heims til framleiðslu raforku.“