Framhaldsskólakennarar eiga digran verkfallssjóð

Djúp gjá er á milli Félags framhaldsskólakennara og viðsemjenda þeirra sem funda hjá ríkissáttasemjara á miðvikudaginn. Kjarasamningar framhaldsskólakennara renna út núna í lok janúar.

„Ríkið býður 2,8 prósent, það er ríkisútfærslu á ASÍ-samningunum, og hefur hafnað okkar kröfugerð. Við gerum skýra kröfu um leiðréttingu. Það munar nær 17 prósentum á dagvinnulaunum framhaldsskólakennara og viðmiðunarhópa okkar hjá ríkinu. Í heildarskýrslu aðila vinnumarkaðarins frá því í haust kom fram að kaupmáttaraukning okkar var lélegust allra frá 2006 til 2013,“ segir Hrafnkell Tumi Kolbeinsson, varaformaður Félags framhaldsskólakennara.

Hann segir verkfallssjóð kennara digran. „Greiðsla úr verkfallssjóði mun ekki ná mánaðarlaunum en sjóðurinn er samt ógnandi. Hann er sameiginleg eign aðildarfélaga Kennarasambands Íslands og í honum eru rúmlega 1.400 milljónir króna. Það hefur engin ákvörðun um verkfall verið tekin en framhaldsskólakennarar, sem eru 1.600 til 1.700 í liðlega 30 skólum, eru þó tilbúnir í ákveðna vegferð.“

Hrafnkell Tumi segir stofnanasamninga algjörlega hafa hrunið hjá framhaldsskólakennurum. „Allt mat á menntun og starfsaldri er farið. Ríkið hefur svikið sína eigin hugmyndafræði. Sem verkfæri eru þeir góðir en þeim þarf að fylgja fjármagn. Þegar ágóði hefur verið í framhaldsskólunum er hann tekinn. Framhaldsskólarnir eru orðnir hringlandi beinagrindur. Það er allt í rjúkandi rúst hjá þeim. Það er búið að vera að taka 12 til 14 milljarða varlega áætlað úr þeim á undanförnum árum.“

Niðurskurðurinn er víða og hefur verið frá því fyrir hrun, að því er Hrafnkell Tumi greinir frá. „Í Flensborgarskóla, þar sem ég kenni, var allt verknám lagt niður um jólin, það er fjölmiðlanám, matreiðsla og myndmennt. Það stefnir í að vissar námsgreinar hverfi. Sérstakar áhyggjur hef ég af verknámi. Í Iðnskólanum í Hafnarfirði hefur tíu prósentum kennara verið sagt upp.“

Hann segir að framhaldsskólakennarar séu orðnir gömul stétt. „Meðalaldurinn er 54 ár. Álagið eykst á okkur og hópar eru stækkaðir. Þar svíkur ríkið einnig eigin viðmið.“

Framhaldsskólakennarar voru síðast í verkfalli frá 7. nóvember árið 2000 til 7. janúar 2001.