Arnór markahæstur í sigri á Gummersbach

Bergischer HC 06 vann tveggja marka heimasigur á VfL Gummersbach, 28-26, í þýsku úrvalsdeildinni í handbolta í dag en Gummersbach-liðið var fyrir leikinn sjö sætum ofar í töflunni.

Arnór Þór Gunnarsson skoraði sjö mörk fyrir Bergischer í leiknum og var markahæstur í liðinu ásamt Austurríkismanninum Viktor Szilagyi. Björgvin Páll Gustavsson stóð í marki Bergischer.

Arnór Þór skoraði meðal annars mikilvægt mark þegar hann kom sínum mönnum í 27-25 þegar tvær og hálf mínúta var eftir af leiknum. Gummersbach minnkaði muninn í eitt mark en Milos Dragas innsiglaði síðan sigurinn með 28. markinu.

Þetta var fjórði sigur Bergischer HC 06 í fyrstu átta leikjunum en liðið hoppaði fyrir vikið upp í 6. til 9. sæti deildarinnar.