Umhverfissinnar æfir með ákvörðun ráðherra

Umhverfisverndarsinnar eru æfir yfir ákvörðun umhverfis- og auðlindaráðherra að breyta friðlýsingarskilmálum sem unnir voru af Umhverfisstofnun fyrir stækkun friðlands í Þjórsárverum. Verndarsinnar telja með þessu opnað á virkjunarkosti í efri Þjórsá sem gæti spillt einni fallegustu fossaröð landsins. Ráðherra segir verndarsinna fara með rangt mál.

Náttúruverndarsamtök Íslands telja að Sigurður Ingi Jóhannsson, umhverfis- og auðlindaráðherra, reki fleyg inn í hjarta Þjósársvers með því að undanskilja svæði vestan Þjósársvers. Með þessu sé á ný opnað á Norðlingaölduveitu í efri Þjórsá en deilt hefur verið um þá virkjun um árabil. Guðmundur Hörður Guðmundsson, formaður Landverndar, segir ákvörðun umhverfisráðherra umdeilda.

„Það mátti svo sem búast við því að þessi ríkisstjórn myndi breyta stefnunni og þarna er ríkisstjórnin að halda þessum glugga opnum að Norðlingaölduveita verði reist,“ segir Guðmundur.

Glæsileg fossaröð í hættu

Ein glæsilegasta fossaröð landsins er í efri Þjórsá. Efstur er Kjálkaversfoss en neðar koma þeir Dynkur og Gljúfurleitarfoss en þessum fossum líkja margir við Gullfoss enda tilkomumiklir fossar. Guðmundur óttast örlög þessara fossa.

„Það myndi endanlega gera út af þessa fossa ef Norðlingaölduveita verður reist. Það hefði átt að vera búið að stinga þessum áformum inn í skúffu fyrir löngu. Niðurstaðan var sú að það ætti ekki að virkja á þessu svæði, svæðið fór í verndarflokk og við héldum að þessi deila væri úr sögunni.“

Svæðið enn í verndarflokki

Sigurður Ingi Jóhannsson, umhverfis- og auðlindaráðherra segir umhverfisverndarsinna gera alltof mikið úr ákvörðun sinni. Hann leggur áherslu á að Norðlingaölduveita sé í verndarflokki og verði innan friðlandsins.

„Við erum fyrst og fremst að ná mjög stórum áfanga í náttúruvernd á Íslandi með því að friðlýsa mjög stóran hluta þessa svæðis, stækka friðlandi í Þjósárverum talsvert og friðlýsa þann kost sem settur var í vernd í rammaáætlun 2,“ segir Sigurður Ingi í samtali við fréttastofu Stöðvar 2.

Umhverfisráðherra segir það ekki vera í hans verkahring að taka ákvarðanir um hvaða svæði eigi og eigi ekki að virkja. Hann er þó hrifinn af fossunum í efri Þjórsá.

„Þetta eru gullfallegir fossar. Ég fór um svæðið í hestaferð fyrir nokkrum árum og þetta er gullfallegt svæði.“